PNTL halo atuasaun ba membru AUTL hirak ne’e tanba tuir konkordansia sira-nia asaun hala’o de’it iha area kampus UNTL, Liceu.
Tuir observasaun jornalista www.tempotimor.com iha tuku 15:10, manifestante sira kuaze na'in 20 hahú hakbesik an ba edifísiu MESSK hodi hala'o asaun pasífika no husu Ministru Longuinhos atu rezigna an.
Iha sira-nia asaun protesta ne’ebé hala’o iha edifisiu MESSK, membru AUTL sira konsidera Ministru Longuinhos halo diskriminasaun ba estudante sira.
"Ami hakarak señor ministru rona ami-nia ejizensia, tanba estudante sira ne'ebé hala'o estudu iha rai laran ne'e mesak ai-leba, ain tanan no materestu nia oan de'it, tanba ne'e labele halo diskriminasaun, ami mós iha direitu," dehan manifestante ida, Alcino Moniz.
Hafoin liu minutu balun, PNTL to'o hodi husu AUTL atu sira fila ba fatin demostrasaun, maibé estudante hirak ne’e firme, nune'e PNTL kaptura estudante na'in 14, kompostu husi mane na'in 12 no feto na'in rua, hodi lori ba edifisiu PNTL Kaikoli.
Hafoin PNTL lori estudante sira ne'e, jornalista sira koko konfirma ho Ministru Longuinhos, maibé nia parte la fó komentáriu tanba okupadu.