Print this page

MEJD-GIZ Asina MoU ba Projetu Ai ba Futuru

By September 02, 2020 1370
Diretóra Jerál Planu Polítika no Inkluzaun MEJD, Odília das Dores Un Marting (loos), no Reprezentante GIZ iha Timor-Leste, Raine Schellhaas (karuk), koalia hela ba média sira hafoin asina akordu iha Projetu Ai Ba Futuru, iha Edifísiu MEDJ Balíde , kuarta (02/09). Diretóra Jerál Planu Polítika no Inkluzaun MEJD, Odília das Dores Un Marting (loos), no Reprezentante GIZ iha Timor-Leste, Raine Schellhaas (karuk), koalia hela ba média sira hafoin asina akordu iha Projetu Ai Ba Futuru, iha Edifísiu MEDJ Balíde , kuarta (02/09). Foto Tempo Timor

TempoTimor (Díli)- Ministériu Edukasaun, Juventude no Desportu (MEJD) asina nota intendimentu (MoU) ho organizasaun Gesellschaft Internasonale Zussammenarbeit (GIZ) husi Alemaña ba projetu Ai ba Futuru.

Diretóra Jerál Planu Polítika no Inkluzaun MEJD, Odília das Dores Ung Martins hatete, projetu Ai ba Futuru ne’ebé oferese husi GIZ ne’e, sei kuda iha eskola teknika vokasionál sira iha Timor-Leste.

Ba faze dahuluk, nia dehan, sei kuda uluk iha eskola teknika vokasionál rua iha munisípiu Vikeke hanesan Kaloheda iha Uatulari no Ravína iha Lakluta.

“Ai-oan sira ne'ebé atu kuda mak hanesan haas, sabraka, ai-teka, mahoni no sira seluk tan ne'ebé bele garantia  moris ita-nia komunidade sira nian ba iha futuru, atu aumenta rendimentu ekonómia ba iha ita-nia komunidade sira, liu-liu ba ita-nia alin estudante sira,” dehan Odília iha MEJD, Balíde, Kuarta (02/09).

Nia dehan, apoiu ida ne’e sai hanesan prosesu ida ne'ebé di'ak atu bele tulun estudante sira, liu-liu ba eskola teknika vokasionál, atu bele kriativu hodi hadi'a sira-nia moris liu husi kuda ai-oan iha kada eskola.

Lori governu nia naran, Odilia husu ba GIZ atu kontinuasaun apoiu eskola teknika vokasionál sira ne'ebé lokaliza iha munisípiu sira seluk.

Iha fatin hanesan, Reprezentante GIZ no Projetu Ai ba Futuru iha Timor-Leste (TL), Raine Schellhaas hatete, nia parte sei koloka péritu ida ne'ebé hanaran development adviser, atu bele apoia área ida ne'ebé ohin konkorda hamutuk.

“Projetu ne'e hanesan ita-boot sira hatene, aqua floresta, kuda ai-oan buat sira ne'e hotu, mais aumezmu tempu hakarak hasa'e kapasidade iha seitór ida ne'e rasik, tanba ne’e ami koopera ho ministériu edukasaun atu nune'e bele apoiu hotu intermus konteúdu materiál floresta ninian ho eskola sira ne'ebé mak projetu ne'e koopera ba iha ministériu edukasaun nia okos,” dehan nia.

Molok ne’e, nia dehan, GIZ serbisu hamutuk tiha ona MEJD iha projetu sira seluk, no sira hakarak atu kontinua serbisu sira ne'e ho fali área seluk ba tinan sira ne'ebé sei mai.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items