Prezidente Grupu Muilleres Parlamentares Timor-leste (GMPTL), Lidia Norberta dos Santos Martins hatete, familia sira tenke fó edukasaun kona-ba seksuál ba oan sira, atu nune'e sira mos iha koinesimentu hodi prevene asesu filme pornografia no kazu soe bebé.
"Ita taka informasaun ba oan sira ohin loron maibé, sira iha maneira oinsá atu asesu ba informasaun, sa tan ohin loron hotu-hotu uza telemovél asesu ba ínternet. Husi dadus ne'ebé instituisaun relevante sira iha kuaze telefone ne'ebé labarik sira uza iha Timor, sempre asesu ba iha pornografia ka website pornografia nian makaas", dehan nia, liuhusi konferensia imprensa, iha Parlamentu Nasional, Segunda (24/08).
Tanba ne'e, ministériu kompetente hanesan Sekretariu Estadu Komunikasaun Sosiál (SEKomS) atu kontrola mós ba website pornografia sira atu labele fo asesu livre ba minoridade sira.
"Sekretariu Estadu Komunikasaun Sosiál ne'ebé kaer autoridade nasionál komunikasaun ho tan orgaun sira seluk bele mós iha maneira oinsa mak halo sensura ba website pornografia sira para bele kontrola, atu nune'e ita bele haree ba kestaun ne'e", tenik nia.
Kestaun seluk bele haree mos ba fatin prostituisaun sira hanesan otel tanba, dala barak otel sai hanesan fatin ba halo relasaun seksual.
Nune'e, GMPTL husu mos ba familia sira atu kontrola labarik minoridade feto no mane atu labele halo seksuál livre para bele kombate kazu soe bebé iha Timor-Leste. (*)
PUBLISIDADE HUSI MOP FO PARABENS BA LORON FALINTIL