Xefe Estadu hatete, juventude sira-nia moris sei naruk, entaun presiza aprende atu banati tuir saida mak asuwa'in FALINTIL sira halo iha 24 nia-laran.

Nia hatutan, uluk FALINTIL sira sakrifika aan tanba hakarak Timor-Leste independente, tanba ne'e tempu ona agora joven sira mak tenke buka halo saida, no oinsá bele valoriza istória ukun rasik-aan nian.

Nia dehan, istória ne'ebé tuir faktu mak sei fó valór loloos ba sakrifísiu tomak hosi asuwa'in sira ba pátria ne'ebé sei hamoris patriotizmu no nasionalizmu no ba jerasaun sira tuir mai atu kaer metin valór solidariedade, espíritu sakrifísiu, kriativu no fó-aan tomak ba povu no nasaun.

"Ba joven sira atu labele baruk hodi aprende no banati tuir saída mak asuwa'in FALINTIL sira hatudu iha tinan rua nulu resin haat nia laran. FALINTIL sira sakrifika sira-nia aan totál ba pátria no agora, joven sira, imi-nia tempu atu kontinua hatutan sakrifísiu asuwa'in FALINTIL ho estuda makaas, badinas no ajuda malu hodi dezenvolve rai doben Timor-Leste," dehan Xefe Estadu, Francisco Guterres Lú Olo, iha Kuartél Jenerál Fatuhada, Kinta (20/8).

Maski nune'e, Komandante Supremu Forsa Armada ne'e fiar katak Jerasaun foun sira sei iha orgullu atu konta no hakerek nafatin kona-bá glorioza FALINTIL nian. (*)

PUBLISIDADE HUSI MOP FO PARABENS BA LORON FALINTIL