Diretór Jerál Edukasaun, Munisípiu Dili, Duarte Bragança hateten, daudaun ne'e eskola sira ne'ebé eziste iha Munisípiu Dili husi totál 197 hamutuk eskola 174 mak reativa ona no 23 mak seidauk reativa.

"Husi númeru eskola sira ne'e, 88% mak ita reativa ona no 12% mak ita seidauk reativa, ho razaun tanba seidauk priénxe rekézitu husi Ministériu Saúde", dehan nia.

Entretantu, totál eskola sira iha Munisípiu Dili nian mak hanesan, eskola pre-eskolar hamutuk 60 hamutuk eskola 47 mak reativa ona, no eskola 13 mak seidauk. Eskola ensinu bázika hamutuk 106, maibé eskola 97 maka reativa no sira mak seidauk. Eskola sekundária jerál hamutuk 22 mak reativa hotu ona. Eskola Téknika Vokasionál hamutuk 9, maibé eskola 8 mak reativa ona, no sei falta eskola 1 maka seidauk.

Nia dehan, eskola balun iha kapital Munisípiu Dili ne'ebé seidauk reativa aula aprendizajen, tanba seidauk priénxe rekezitu husi Ministériu Saúde, hanesan eskola seidauk moos ho di'ak, seidauk estabelese bee ho sabaun iha eskola hodi fasilita eatudante sira atu bainhira tama iha arredór eskola nian tenke fase liman.

Tanba ne'e, tenke kompletu hotu no dala-ruma fasilidade ne'ebé tama iha komponente ba mata-dalan ninian seidauk kompletu, entaun husi ekipa saúde nian sira tún ba la aprova. Tanba sira tenke aprova maka foin bele hahu reativa prosesu aprendizajen.

 Maske nune'e, governu liuhosi MEJD sei buka dalan esforsu nafatin atu iha tempu besik eskola hotu-hotu iha territóriu nasionál bele hala'o ona sira nia prosesu aprendizajen ba estudante sira. (*)