Nune'e, Komisaun G PN trata asuntu Edukasaun, Juventude, Kultura no Sidadania, simu proposta ne'e no sei lori ba diskute iha Plenária PN.
Prezidente KIESP-TL, atuál Reitór IOB, Augusto da Conceição Soares hateten, sira hato’o proposta ba Komisaun G atu bele propoin orsamentu tokon US$ 5.8 husi Orsamentu Jerál Estadu (OJE).
“Ami-nia proposta hamutuk 10 mak hanesan fó bolsu estudu ba ami-nia dosente sira, ami husu bolsu estudu ba ami-nia estudante sira, husu subsídiu salariál ba ami-nia dosente sira, husu fasilidade laboratóriu hanesan internete, komputadór," dehan nia, iha Parlamentu Nasional, Kuarta (8/7).
Aleinde ne'e, husu subsídiu empréstimu ne’ebé ho funan ki'ik nune’e bele dezenvolve instituisaun.
Nia hatutan, kada tinan Governu prevé orsamentu b UNTL tokon US$11 to’o tokon US$13, tanba ne'e husu atu konsidera mós konsidera ensinu superiór privadu sira nia preokupasaun.
Prezidente KIESP-TL hateten, estudante ne’ebé oras ne’e iha ensinu superiór privadu 10 hamutuk 45.000 no dosente hamutuk 2.000.
Nia akresenta, proposta ne’e rasik hatama ona ba Gabinete Primeiru-Ministru (GPM), Ministériu Ensinu Superiór, Siénsia no Kultura (MESSK), Prezidente Repúblika no Prezidente Parlamentu Nasionál.
Entertantuz reprezentante Komisaun G PN, Antonio Verdial hateten, daudauk sira simu ona proposta ne'ebe mai husi ensinu superior privadu sei tau ajenda atu bele diskute nune'e foin lori ba plenária atu bele tau konsiderasaun iha OJE.