"Bainhira koalia kona-ba asun politik nian ha'u lakohi ko'alia tama politik ninia, maibé kuandu sarani ruma uza kahur ritual uma kreda nian hodi destroi no dezorienta sarani sira husi dalan sarani nian, ne'e uma kreda iha nia lia-fuan atu dehan katak ne'e sarani la lao iha dalan ne'ebé loos," informa Arcebispu ba jornalista sira iha rezidensia Episcopal Lecidere Dili, Kuarta (01/07).
"Bainhira iha eventu ritual ruma tuir ita-nia hakarak atu atrai ema, atu hadok ema husi Maromak nu'udar Bispu ba uma kreda tenke dehan katak ida ne'e la loos, no tenke buka atu iha dalan loos," dehan Bispu.
Arcebispo ne'e apela ba sarani sira hotu atu labele sai sarani ida ne'ebé aikakeu, naran hakarak koko buat hotu. Nu'udar sarani tenke tau identidade ne'ebé loos, buat ne'ebé loos tenke dehan loos atu rona ka la rona, ikus mai maromak mak tenke halo justisa.
Molok ne'e, Deputadu bankada Kmanek Haburas Unidade Nasional Timor Oan (KHUNTO) Luis Roberto deklara, dezkonkorda ho deklarasaun Amu Martino Gusmão no Domingos Maubere ne'ebé kestiona atividade juramentu ne'ebe Konseleiru KHUNTO Naimori Bukar hala'o ba sira-nia militante.
Nia dehan, politika partidu nian hala'o tuir dinamika politika ne'ebé la'o hela iha Timor-Leste, tan ne'e parte igreja kuandu la hatebe tenke buka atu hatene, se la komprende buka atu husu ba politiku nain sira.