Agora ema hotu-hotu hein desizaun hosi Amo Papa. Ofisial Encaregado hosi Embasada Vaticano, Monseigneur Marco Sprizzi liu hosi intervista ho Tempo Timor hateten “Seidauk iha resposta ofisial ida, ida ne’e bele sai nudar sinal diak”. Tamba dalaruma vizita ne’e sei la akontese, “no ida ne’e ita hatene ona”.
Ofisial Encaregado ne’e mos hateten katak Amo Papa mensiona hakarak mai Timor-Leste. Nia koalia ida ne’e iha tinan kotuk wainhira hatan pergunta balun hosi media. Nia hateten ba jornalista sira katak nia sei la vizita Argentina, maibe hateten katak nia hakarak mai Timor-Leste.
Ofisial Encaregado Embasada Vaticano iha Timor-Leste informa katak sira pronto hodi organiza “Ami informa ba Amo Bapa no nia gabineti katak ami prontu no hakarak hodi bele hetan vizita hosi Amo Papa iha Timor-Leste hodi bele fo nia bensaun ba nasaun ida ne’e no nia emar liu hosi nia prezensa”.
Maske Timor-Leste nudar nasaun ida ne’ebe maioria katolika, maibe ida ne’e laos sai hanesan razaun ba Amo Papa atu mai. Amo Papa hakarak ba fatin hotu-hotu, inklui mos nasaun musulmanu sira, nasaun Budha, Hindu no seluk tan. Nia ba ema sira ne’ebe dook hosi relijiaun. Nia hanesan bibi atan diak ida ne’ebe Jejus koalia, ida ne’ebe ba fatin dook iha nebe bibi barak maka lakon, tamba nia fiar katak bibi sira seluk iha ona fatin seguru.’ Sprizzi hateten no mos rekunese katak ‘nia nudar aman hosi labarik sira iha igreja, ida ne’ebe presija mos nia prezensa’.
Se Amo Papa mai Timor-Leste, ida sei sai nudar primeira vez depois de vizita istoriku iha 1989 hosi Amo Papa Joao Paolo II ida ne’ebe akontese durante tempu okupasaun Indonesia iha ne’ebe ema barak moris terus hosi presaun brutal no Timor-Leste izoladu hosi mundu global. Amo Papa koalia hasoru violasaun direitu umanu ne’ebe komite hosi militar Indonesia, nune’e ema barak senti sira hetan suporta hosi Amo Papa nia prezensa.
“Vizita momentu ne’eba ne’e iha influensia boot, signifikante no importante iha istoria Timor-Leste entermus harii fila-fali identidade nasional no mos funu ba independensia’
