Edifísiu foun FEST-UNTL konstrui ho osan kuaze tokon $21 husi Governu Japaun hodi ajuda ambiente dezenvolvimentu apredijzen iha nasaun ne'e.

"Orsamentu ba konstrusaun edifísiu ne'e governu Timor-Leste nunka hasai doit metan ida", dehan Reitór UNTL, Francisco Míguel Martins, iha ambiente inaugurasaun edifísiu foun FEST, iha Hera, Tersa (14/1).

Apoia ne'e oferese hafoin UNTL aprezenta proposta ba Governu Japaun ba konstrusaun eis-edifísiu Politeknika ba sai edifísiu FEST, iha tinan 2013 no prosesu foin hahú iha 2017.

"Iha 2017 ha'u ba Japaun ne'e, atu asina konstratasaun no aseitasaun ba kompañia ne'ebé atu konstrui edifísiu ida ne'e", tenik nia.

Reitór ne'e afirma, edifísiu foun ne'e nu'udar istória boot ba UNTL dezde harii iha tinan 2000 to'o agora.

Edifísiu ne'e aleinde iha sala aprendizajen, iha mós sala reuniaun, auditóriu, laboratóriu, jardín no fasilidade seluk tan hanesan karteira, data show, long distance ba ínternet no ekipamentu ba laboratóriu inklui ekipamentu laboratóriu.

Atu asegura edifísiu ne'e, UNTL sei tau orsamentu ba manutensaun, seguransa no limpeza.