Portvoz KPMD, Aniceto Pedro da Costa hatete, MEJD la konsidera ba grau akademiku professor sira ne'ebé mak sai Lisensiatura ka Majestradu no la valoriza sira-nia avaliasaun dezempeñu.
"Profesor sira ne'ebé assumen kargu hanesan Diretor, Adjuntu ho GAT balun hetan tiha nia direitu retorativu maibé balun lae, ida ne'e hanesan diskriminasaun. Ezemplu sira hetan $3 Mill maibé edukasaun selu de'it $1.372 no balun $1.400 to'o $1.500, ida ne'e klareza ho nune'e ami mai hato'o tanbá iha balun mós la simu", dehan Aniceto iha Parlamentu Nasionál, Sesta (15/11).
Entretantu, Deputadu Komisaun G, Sabino Guntur hatete, husi relatoriu ne'ebé KPMD entrega hatudu katak durante ne'e MEJD la halo pagamentu retorativu ba professor sira tuir estandarte ne'ebé funsaun publika hatete ona.
"Dezde 2018 no 2019 osan ida ne'e preve ona maibé tanbá saida seidauk rezolve? ne'e problema ministra edukasaun nian, ami nu'udar reprezenta povu ami sei husu pedidu ba Ministeriu Edukasaun no Funsaun Publiku, liu-liu rekursu umanu iha MEJD par sira justifika sasan sira ne'e, se lae problema tinan ba tinan nunka sai husi fatin ne'e", dehan Guntur.
Guntur eaplika, rekursu umanu nu'udar fator dinamika hodi hasa'e lalais sistema edukativu.
Maibé, deputadu ne'e konsidera ho pagamentu retroativu ne'ebé la implementa ho didi'ak bele fó impaktu negativu.
"Pagamentu la tuir padraun sira ne'ebé durante ne'e bazeia ba meritu de avalaisaun ne'ebé eziste iha sistema," dehan Guntur.
Nia dehan, profesor sira-nia kuantidade grau sai maibé hafoin transfere osan ba sira-nia konta bankaria la atinje tuir buat ne'ebé Komisaun Funsaun Publika identifika.