Diretór Servisu Edukasaun Munisípiu Baukau, Augusto Ornai Ximenes, esplika, treinamentu ne’e atu fasilita manúal programa merenda eskolár tinan 2023 nian ba ekipa sira molok implementa, tanba difirente ho implementasaun tinan 2022.

"Agrupamentu hamutuk 35 tuir treinamentu loron-2, ne'e iha ema na'in-2 mak mai kordenador ida no tezoreiru", dehan nia iha vila nova Baukau, Tersa (07/06).

Ekipa ezekutadór sira mós sei asina kontratu servisu ho autoridade Munisípal, molok implementa programa refere iha nivél eskola tuir kalendáriu tentativa, iha tempu badak.

Prezidente Autoridade Munisípiu Baukau, Olivio Freitas, enkoraja ezekutadór sira atu jere osan ho responsabilidade, nune'e bele fó saúde di'ak ba estudante sira iha vontade estuda, tanba estudante sira mak sai futuru ba nasaun nia dezenvolvimentu.

"Orsamentu ba merenda eskolar iha tinan ne’e hamutuk miliaun US$2.3, tanba ne’e husu ezekutador sira jere osan ne’e ho responsablidade", nia husu.

Enkuantu reprezenta ekipa jestaun merenda eskolár, Emereciana Beatris Guterres, konsidera, treinamentu ne’e importante, tanba implementasaun tinan 2022 difirente ho tinan 2023.

"Ita persiza tuir treinamentu atu iha implementasaun ita labele ses husi mata-dalan ne'ebé iha", nia akresenta

Entretantu tuir mata-dalan programa merenda eskolar ba tinan-2023 la-indika kualker funsionáriu ruma atu jere orsamentu, maibé halo de'it akompaña no despaxu husi diritiva eskola, tanba orsamentu sei transfere direitamente ba konta bankária ekipa jestaun.

Ekipa ne'ebé previstu iha manúal merenda eskolar 2023, kompostu husi kordenadór ida, vogál na'in-3, tezoreiru ida, inklui kojeneira sira.

Totál eskola ne'ebé sai benefisiáriu ba programa merenda eskola iha Baukau, hanesan, eskola bázika sentral hamutuk 26, ho nia filial pur-volta 180-resin, inklui pré-eskolar hamutuk 34, previstu benefisiáriu hamutuk rihun 32-resin. (*)