Primeiru Minístru, Taur Matan Ruak kontente ho inisiativa husi Fundadór Eskola Sekundária Tékniku Vokasional (ESTV) Kolejiu Fundasaun Maria Rejina (FSMR), tanba bele fo formasaun ba komunidade nia oan sira.
"Ha'u agradese tebes ba inisiativa ida ne'e, liu liu fo kontribuisaun ba formasaun ba ita nia oan sira nian, iha área kontabilidade ne'e importante loos", dehan PM Taur iha Suku Wenunuc Postu Administrativu Metinaro Munisípiu Dili, tersa (01/02)
Alende ne'e nia mós husu ba Instituisaun relevante sira hanesan Ministériu Edukasaun, no Ensinu Tekniku Vokasional sira, inklui Sekretáriu Estadu Formasaun Profesional no Empregu atu kontinua apoiu eskola refere hodi bele la'o di'ak iha futuru.
"Parabéns ba inan ho aman sira ne'ebé fó apoiu maka'as inklui estudante sira konta apoiu Governu nia liu-liu instituisaun estadu sira, atu tau matan ba ita nia oan sira hodi asegura katak, tenke kumpri regras sira estabelese, no fasilita iha área sira ne'ebé iha difikuldade sira", nia hatutan.
Nune'e, Fundadór no Presidente Fundasaun Maria Rejina (FSMR), Azevedo Lourenco da Costa Amarál informa, misaun husi fundasaun refere, atu fasilita matéria Akuntabilidade ba joven sira hodi asesu ba servisu no hamenus dezempregu iha Timor-Leste.
"Konsentra ba Accounting de'it, tanba Accounting ne'e problema boot iha Timor-Leste ne'ebé nunka rezolve la iha formasaun ida ne'ebé hakarak rezolve ida ne'e, edukasaun sira mós iha liu-liu lisiensiatura no mastradu, maibé teoria mak barak liu, ne'e mak di'ak liu konsentra pursentu 75 prátika no pursentu 25 teoria, entaun hotu ida ne'e sira bele ba servisu ona", nia hateten.
Tarjetu husi eskola FMSR ne'e bainhira jovens sira ne'ebé remata ona, ba estudante sira ne'ebé hakarak kontinua ba estudu iha Banku universidade sira bele kontinua, maibé ba sira ne'ebé hakarak servisu sira iha ona skill oituan hodi bele hala'o servísu.
"Prepara joven sira ba obsaun tolu de'it, Primeiru tama ba kampu traballu, segunda obsaun kontinua ba universidade liu liu Polítekniku, terseiru obsaun mak lori sira ba vida emprezariu ita lakohi atu lori sira ba dezempregu", nia afirma.
Nune'e, Autoridade lokál husi Suku refere hato'o agradese ba fundadór Eskola, tanba bele fasilita nia oan sira hodi eskola de’it iha nia Postu rasik no la hakat ba Dili.
Dadaun Fundasaun Santa Maria Rejina iha sala lima, ne’ebé akumula estudante hamutuk 36.
Total orsamentu ba konstrusaun Eskola Sekundaria Tékniku Vokasional ESTV Kolejiu Fundasaun Santa Maria Rejina hamutuk rihun 100-resin. (*)