Diretór servisu edukasaun Baukau, Augosto Ornai Ximenes, hatete, misa abertura nu’udar asaun ida husu parte agradese ba anu letivu tinan-2022.

"Agradese tinan eskola 2022 no husu bensaun ba ita nia atividade ne'ebé la'o iha tinan ida ne'e, hetan grasa no kbi'it atu ita bele hala'o ita nia servisu sira durante iha Munisípiu Baukau", dehan nia iha Katedrál Santo António Vila Antiga Baukau, Tersa (17/01).

Liuhusi ómilia Amu selebrante, Administradór Diozese Baukau, Padre Alipio Gusmão, hatete, ema ne'ebé matenek mak moris tuir maromak nia ukun fuan no presiza rona barak, tanba edukasaun ohin loron iha Timor-Leste, la iha kualidade.

"Edukasaun tempu ohin loron kompara ho edukasaun tempu uluk hanesan de'it, tanba atu hetan edukasaun ne'ebé kualidade bazeia ba tempu tuir ema ida-idak nia moris", nia hatete

Husu profesores sira iha eskola Katólika, atu simu estudante sira ne'ebé ho hahalok sabraut no la hetan valór diak, atu eskola mós iha eskola Katóliku sira, nune'e bele transforma nia hahalok sai di'ak no sai ema edukadu inklui mós bele hetan valór di'ak, hanesan, estudante seluk.

"La'os simu de'it estudante ne'ebé hahalok di'ak no hetan valór di'ak, sé tina-tinan simu estudante ne'ebé hetan valor di'ak, maibé la simu estudante ne'ebé hahalok sabraut no valór ki'ikoan, haruka ba eskola iha área remota, depois imi dehan la iha kualidade, novidade saida mak imi transmiti mai ami", nia dehan

Entretantu partisipa iha misa abertura tinan eskolar 2023, husi diritiva eskola sira, estrutura edukasaun Munisípal, Administradór Postu Baukau Vila, inklui estudante sira, husi eskola nivél pré-primaria to'o sekundária inklui ténkinu vokasionál no eskola privadu sira. (*)