"Ohin ami halibur diritiva eskola sira, simu orientasaun hodi ba eskola sira forma ékipa jestaun programa merenda eskolar tempu besik ita implementa programa merenda eskolar", dehan Diretór Servisu Edukasaun Baukau, Augosto Ornai Ximenes, iha salaun apuramentu Baukau, segunda (16/01).
Programa merenda eskolar ba tinan-2023 iha difirente ho tinan-2022, tanba iha tinan-2022 dirijente eskola sira hamutuk gabineti apoiu tékniku inklui tein na'in sira mak ativu iha ezekusaun, maibé iha tinan-2023 matadalan foun, sei kria ékipa jestaun programa merenda eskolar hafoin jere orsamentu.
"Iha matadalan ne'e la temi diretór eskola, kualker funsionáriu ida jere, tenke foti husi ema la'os funsionáriu, maibé hetan akompañamentu no despasu husi diritiva eskola", nia afirma
Mekanismu atu foti osan ba programa merenda eskola, ékipa jestaun sei tuir tán formasaun ba prosesu ezekusaun orsamentu hafoin asina kontratu husi Autroridade Munisípal, nune'e hetan legalidade hodi loke konta bankaria, hafoin servisu administrasaun tranfere orsamentu.
"Ékipa ne'ebé previstu iha manúal ne'e, sei iha kordenadór ida, vogál na'in-3, tezoreiru ida, inklui kojeneira sira", nia informa
Benefísiu husi programa refere atu hadi'a nutrisaun ba povu nia oan, tanba bazeia ba estudu ne'ebé iha Timor-Leste sei iha númeru ma-nutrisaun aas.
"Tanba ne'e mak hanesan politika estadu nian atu bele hadi'a liuhusi programa ida ne'e", nia hatete
Eskola ne'ebé sai benefisiáriu ba programa merenda eskolar iha Baukau mak, eskola bázika sentral hamutuk 26, ho nia filial pur-volta 180-resin, inklui pré-eskolar hamutuk 34, previstu benefisiariu hamutuk rihun 32. (*)