Diretór servisu edukasaun Munisípiu Baukau, Augosto Ornai Ximenes, hatete, MEJD orienta ona liuhusi karta sirkular, atu eskola públiku sira iha Timor laran inklui iha Baukau, ba estudante foun sira labele sosa farda seluk, tanba iha ona dezisaun atu uniforme farda eskola nian ba estudante sira iha tinan-2023.

"Ita orienta ona ba eskola sira atu kumpri sirkulár ne'ebé Ministéru fó sai, estudante foun tenke hein dezisaun, labele sosa lai farda ba sira", dehan nia iha kna'ar fatin, Kuarta (11/01).

Implementa uniforme ba estudante sira ne'e, husi eñsinu báziku premeiru anu, eñsinu báziku setimu anu (treseiru siklu), desimu anu eñsinu sekúndariu jerál no públiku inklui tekniku vokásional públiku sira, maibé eskola privadu kontinua la'o tuir sira nia autonomu rasik.

Enkuantu estudante husi eñsinu báziku segundu anu to'o sesto anu, no eñsinu bákziku (treseiru siklu) oitavu ano to'o nonu anu, sekúndariu jerál, sekúndariu públiku inklui tekniku vokásional públiku husi desimu segundu to'o desimu terseiru anu, kontinua uza farda eskola ne'ebé antes uza ona.

"So aplika uniforme nasionál ne'e hahú ho sira ne'ebé primeiru anu, entaun sira tamat farda sira lakon, uza ona farda uniforme eskola nian, entaun bainhira mak Ministéru hatun farda uniforme ne'e, ita hein", nia dehan

Tanba ne'e, parte edukasaun bandu atu inan ho aman sosa farda eskola nian husi liur ba estudante foun sira, hanesan iha eskola primeiru anu husi eñsinu báziku to'o eñsinu sekúndariu jerál no públiku inklui tekniku vokásional públiku.

Entretantu, tuir planu prosesu aprendisajem iha Munisípiu Baukau sei hahú ho misa abertura iha loron 17 fulan-janeiru tinan-2023.  (*)