Prezidente Konsellu Jerál, João Baptista Fernades Alves hatete, durante diskusaun sira halo aprovasaun ba totál kandidatu estudante foun ne’ebé atu asesu ba UNTL iha tinan 2023.

“Ohin Konsellu Jerál diskuti asuntu rua importante tebes, ida importante no urjente liu mak matrikula ba estudante foun ne’ebé UNTL tenki desidi númeru estudante foun ne’ebé mak KJ tenki aprova, nune’e ohin konsellu fó ona nia pareser (aprova ona) ba númeru ne’ebé mak sujere husi fakuldade sira”, dehan Prezidente João Baptista Fernades Alves iha sala Video-Konferénsia, UNTL, sesta (06/01).

Hafoin aprovasaun ba totál númeru ne’e, universidade sei kontinua submete ba Ministériu Ensinu Superiór, Siénsia no Kultura (MESSK) hodi konsidera iha prosesu rekrutamentu estudante foun asesu ba UNTL tinan akadémika 2023 nian.

Aleinde ne’e, rona mós aprezentasaun estabelese fakuldade foun ho naran Faculdade de Turismo, Artes, Indústrias, Criatividade no Culturais (FTAICC) ne’ebé lidera husi Profesór Apolinário Magno atuál Diretór Sentru Formasaun Avansada nian.

Sorumutu ne’e, partisipa husi Reitór UNTL, João soares Martins, Vise-reitór ba Asuntu Akadémiku no Garantia Kualidade, Samuel Venancio Freitas, Diretór Sentru Formasaun Avansada-UNTL, Apolinário Magno ho nia Ekipa, Membru Konsellu Jerál no ekipa tékniku sira. (*)