Ministru Prezidénsia Konsellu Ministrus, Fidelis Manuel Leite Magalhães hatete, hafoin sorumutuk iha Palásiu Governu, iha Dili no aprova ona projetu Dekretu-Lei, kona-ba Rejime jurídiku klasifikasaun no inventariasaun beins interese kulturál nian, nune’e mós regra sira ne’ebé aplika ba ninia esportasaun no importasaun.

Diploma ida-ne’e ho ninia objetivu atu prezerva, defeza no valorizasaun beins móvel, konjuntu ba beins móvel no imovel sira ne’ebé klasifika ka propoin klasifikasaun no ba beins imovel sira ne’ebé tama iha zona protesaun nian.

Ministru Ensinu Superiór, Siénsia no Kultura aprezenta mós no aprova projetu Dekretu-Lei ba alterasaun dahuluk ba Dekretu-Lei númeru  33/2017, loron 6 fulan-setembru, kona-ba rejime jurídiku patrimóniu kulturál nian.

Diploma ida-ne’e ho ninia objetivu atu introdús melloria iha prosedimentu klasifikasaun patrimoniál no halo alterasaun ba norma kona-ba direitu proprietáriu, na’in, titulár direitu reál sira seluk kona-ba beins ne’ebé klasifika ka propoin ba klasifikasaun. (*)