Sosializasaun ne’e ho objetivi atu fahe informasaun ba autoridade lokál sira holo bele hatene kona-ba lala’ok IDÚ no  ninia benifísiu sira ba komunidade bainhira implementa.

Reprezentante Diretór Ezekutivu TIC Timor I.P, atual Diretór Dezenvolvimentu Sistema no Aplikasaun, Justu Fernandes hatete, sosializasaun ne’e atu kolabora hamutuk ho autoridade sira no populasaun iha Munisípiu Ainaru hodi habelar informasaun kona-ba programa ID Úniku.

“Ami mós komprende di’ak papel Administrasaun Munisipál nia, tanba ne’e liuhusi sosializasaun programa ID Úniku ida-ne’e, autoridade sira hotu ne’ebé ohin iha-ne’e bele hetan iha informasaun kona-ba ID Úniku”, dehan nia iha abertura Sosializasaun Programa ID Úniku ba autoridade lokál sira iha Postu Administrativu Ainaru Vila, segunda (14/11).

Nune’e, hafoin sosializasaun ne’e, autoridade sira sei hatene, tanba saida mak ID Úniku mosu, benefisiu saida no nia impkatu saida sei fó husi ID Úniku ba Timor-Leste.

Tanba, iha tinan 2021, TIC Timor hetan mandatu husi Governu daualu atu hala’o programa ne’ebé bolu ho naran ID Úniku no nu’udar identidade dijitál ida ne’ebé bazeia ba Konstituisaun Repúblika Demokratika Timor-Leste ne’ebé ko’alia kona-ba Governu elektrónika.

Reprezentante Administradór Munisípiu Ainaro, Levogildo A. Pereira hatete, programa ID Úniku importante, tanba iha pasadu seidauk bele koñese di’ak teknolojia, maibé agora bele koñese ona teknolojia ne’ebé importante iha ema nia moris.

“Agora teknolojia bele ajuda ita halo atividade saida de’it mak iha no fasilita hodi bele hato’o informasaun ne’ebé lalais ba komunidade sira iha baze, tanba iha oportunidade ne’e importante tebes atu fó informasaun ba ita atubele apar liután kona-ba programa ID Úniku”, dehan nia

Sosializasaun ne’ebé hala’o iha Autoridade Munisipál Ainaro, Postu Administrativu Ainaru Vila, hetan partisipasaun husi Reprezentante Administradór Munisípiu Ainaru, Reprezentante Administradór Postu Administrativu Ainaru Vila, Reprezentante Diretór Ezekutivu TIC Timor, Justo Fernandes, Diretór ID Úniku, Florinfo Guterres da Costa, Xefe Suku 7 ho Xefe Aldeia 32, Reprezentante PNTL Eskuadra Ainaru, ajente estadu, funsionáriu destakadu husi Ministériu iha Postu Ainaru Vila no ekipa sosializasaun husi ID Úniku.

Atividade sosializasaun ne’e, hala’o kada Postu sira iha Munisípiu Ainaro hanesan Postu Administrativu Ainaru Vila, Hatu-Udu, Hatu-Builiku no Maubissi durante loron haat nia laran, ne’ebé hahú husi loron segunda to’o kinta (14 to’o 17 fulan-novembru tinan 2022).

Antes ne’e, TIC Timor I.P liuhusi Diresaun IDÚ mós halo ona sosializasaun ba parseiru dezenvolvimentu sira, Ministériu sira, Universitáriu, no entidade relevante sira seluk nomós ba postu sira iha munisípiu Munisípiu Likisá, Ermera, Rejiaun Autonomia Espesiál Oekussi Ambeno (RAEOA) no halo ona aprezentasaun ba Prezidnete Autoridade Munisipál sira no Administradór Munisipál sira iha Reuniaun Konsellu Koordenasaun Teritóriál (KKT) iha Munisiípiu Lautein no sei kontinua ba Munisípiu sira seluk. (*)