Asesora ba Asuntu Edukasaun husi Gabinete Prezidensiál, Dulce Dos Santos Soares hatete, dadauk sira-nia parte simu ona orientasaun husi Prezidente Repúblika atu buka identifika Munisípiu ne'ebé atu sai fatin ba loke feria do livru.

“Iha tan planu atu halo mós feria do livru, tuir orientasaun sua eselénsia Prezidente nian atu halo feria do livru iha Munisípiu”, hatete nia iha Palásiu Prezidensial Bairo Pite, segunda (29/08).

Ba rekomendasaun Xefe Estadu nian mak agora dadaun Gabinete PR iha hela prosesu identifikasaun, no tempu badak sei fó sai ba mídia sira hodi hatutan ba Públiku.
Maske atividade ida-ne'e konsidera ki'ik maibé Servisu Edukasaun Gabinete Prezidensiál, bele halo hodi suporta atividade ne'ebé Governu halo.

Tanba ne'e, gabinete mós sei iha planu ba oin katak sei halo mós atividade ne'e iha fatin seluk maibé depende ba situasaun nomós orsamentu ne'ebé disponível.

Gabinete Prezidente Repúblika mós rekoiñese katak dadauk PR iha programa ida ho títulu "aprende liuhusi konta istória" maibé ida-ne'e sei realiza iha Munisípiu.

Tanba públiku tomak akompana katak foin lalais Prezidénsia Repúblika mós lansa ona atividade Prezidente nian hanesan feria do livru iha Dili, nune’e atividade anual sira ne'ebé agora dadauk iha ne'e presiza muda fali ba Munisípiu no labele halo fali iha Dili. (*)