Print this page

Ohin, Gabinete PR Implementa Programa Aprende Husi Konta Istória

Asesora Ba Asuntu Edukasaun Dulce dos Santos Soares Akompana husi asesor na'in-rua seluk husi Gabinete Prezidente Repúblika (PR), ko'alia hela ba Jornalista iha palásiu Prezidensial Bairo-Pite, segunda (29/08). Asesora Ba Asuntu Edukasaun Dulce dos Santos Soares Akompana husi asesor na'in-rua seluk husi Gabinete Prezidente Repúblika (PR), ko'alia hela ba Jornalista iha palásiu Prezidensial Bairo-Pite, segunda (29/08). Foto Tempo Timor

Tempotimor (Dili)-Gabinete Prezidénsia Repúblika (PR) liuhusi Servisu Edukasaun, ohin (30/09) implementa programa ida ne'ebé ho títulu aprende husi konta istória ba estudante husi nível Ensinu báziku no ensinu Sekundáriu hamutuk na'in-atus-rua (200) iha Munisípiu Likisá.

“Iha aban 30 agostu Servisu Edukasaun Gabinete Prezidensiál sei organiza programa ida ne'ebé ami tau nia títulu aprende liuhusi konta istoria. Atividade sei hala'o iha Likisá, iha área Lauhata ho estudante purvolta 200 mak sei marka prezensa, husi nível Ensinu báziku, terseiru siklu nomós nível Ensinu Sekundáriu”, dehan Asesora ba Asuntu Edukasaun husi Gabinete Prezidensiál, Dulce Dos Santos Soares liuhusi Konferénsia Imprensa iha Palásiu Prezidensial Bairo Pite, segunda (29/08).

Tanba servisu ne'ebé Gabinete Prezidesiál iha ba área Edukasaun nian, dadauk iha programa anuál tolu mak hanesan dezenvolvimentu literásia, no Edukasaun sedu ba labarik sira, inklui dezenvolvimentu kualidade edukasaun enjerál.

Iha programa ida-ne'e sei konvida autór sira ne'ebé iha esperiénsia durante iha tempu rejisténsia maibé sira mós barak aprende lee, hakerek iha tempu rejisténsia no sira balun mós to'o ikus sai líder.

Hanesan ezemplu mak iha líder balun ne'ebé dadaun ne'e kontinua reforsa Edukasaun durante tempu okupasaun Indonézia mai to'o tempu ukun rasik-an, no balun mak sira-nia envolvimentu iha rejisténsia boot tebtebes.

Ba program ho títulu aprende liuhusi konta istória ne'e hanesan meiu ida atu kontinua reforsa kualidade edukasaun iha Timor-Leste, ne'ebé públiku tomak haree katak se dalan ida-ne'e wainhira Estudante sira bele rona diretamente husi autór sira, ida-ne'e bele ajuda estudante sira atubele kompriende.

“Nune'e mós (Estudante) sira mós bele iha interasaun autór sira iha momentu ne'ebá, ida-ne'e mós ita hanoin katak informasaun sira-ne'e sei metin liután iha estudante sira-nia hanoin, kompara mós kuandu sira aprende de'it iha sala laran, ne'ebé mak dala-ruma sira tenke dekor istoria sira-ne'e, ou ka dala-ruma sira-nia profesór mak tenke hanorin ba sira”, esplika nia.

Gabinete Prezidente Repúblika hakarak eskolla dalan sira-ne'ebe mak simples ba estudante sira atu oinsá mak sira iha vontade atu aprende no konta istória.

Programa ho títulu aprende liuhusi konta istória ne'e mós sei fó sai direta husi televizaun Edukasaun ba públiku atu nune'e sira ne'ebé iha tempu bele akompana no partisipa.

Purtantu iha atividade refere mós sei partisipa direta husi Organizasaun CARE Internasional, Fundasaun Alola, Sala Leitura Xanana Gusmão, iha mós abut iha ne'ebá no sira sei lori sira-nia Biblioteka Móvel, inklui sei halo mós atividade ho estudante sira, atividade desportiva liliu jogu, nomós sei iha mos atividade interasaun lubuk ida mak Organizasaun sira-ne'e sei oferese, hanesan apoiu ida ba reforsa liután atividade husi servisu Edukasaun Gabinete Prezidensiál.

Dadauk oradór sira ne'ebé Gabinete PR deside sei ba konta nia istória durante tempu rejisténsia fó nia apoiu tomak ba dezenvolve Edukasaun iha Timor-Leste, dahuluk mak Prezidente Repúblika, José Ramos Horta, no tuir mai mak Padre (Pe) Elígio Locatelli, inklui Veterana Madalena Bidau Doares "Kasian".

Maibé Gabinete Prezidente Repúblika mós konvida veteranu ida husi Oelusi ne'ebé koinesidu ho naran "Lafu" tanba durante iha tempu rejisténsia nia kontribui boot tebtebes hodi lori karta ida husi Oekussi mai to'o iha INTERFET sira.

Nune'e mós sei konvida Ministru Edukasaun Juventude no Desportu (MEJD), Armindo Maia sai oradór tanba nia mós ema ida ne'ebé sai Ministru dahuluk iha tempu ukun-rasik-an to'o agora.

“Ita mós konvida Ministru atu fahe nia esperensia lidera Edukasaun e nune'e mós iha esperiénsia iha rejisténsia hanesan abertura ida ba programa aban nian”, haktuir nia.

Ba atividade refere parte ekipa Gabinete Prezidente Repúblika mós haruka duni konvite ida ba veteranu Gil Oan Soru ne'ebé tuir loloos atu partisipa maibé tanba iha preokupasaun seluk entaun labele marka prezensa.

Enkuantu orsamentu ne'ebé aloka ba programa refere, hetan apoiu maka’as husi Organizasaun UNICEF ho montante rihun $12. (*)

Rate this item
(0 votes)
Last modified on Wednesday, 31 August 2022 11:28
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items