Tuir informasaun ne’ebé www.tempotimor.com, asesu iha pájina PM, segunda (08/08) katak, lansamentu ba programa husi Ministériu Edukasaun Juventude no Desportu nian, hanesan Eskola iha uma, (Home Schooling), Bolsa estudu ba mellores estudantes, Koneksaun Internet ba Eskola hotu, Distribuisaun Kaderneta, Estudu Viabilidade Eskola de Raízes, Distribuisaun Karteiras, no Atribuisaun Premiu ba Mellor Alunu ne’ebé hamorin ona Timor-Leste nia naran iha eventu sira internasionál nian.

Primeiru Ministru, Taur Matan Ruak iha nia intervensaun hatete, programa sira refere importante tebes liga destinu estudante sira-nian iha futuru mai.

“Serimónia ne’e importante tebes ne’ebé liga ba vida futuru, destinu ita-nia oan estudante sira-nia, ha’u kontente los rona estudante KAFE Baukau, ohin kanta iha-ne’e, ha’u fiksa hela liafuan ida, hatete ‘Só Melhor, Só mior vou lutar até ao fim’, ida-ne’e mak ita hotu tenke halo ‘Só melhor, vou lutar átefim’, espiritu ida-ne’e mak orienta jornada ita-nia nasaun, ita-nia povu nian”, dehan PM Taur.

Tanba iha tempu uluk lider sira agora mós hanesan estudante sira, maibé ho esforsu ne’ebé iha kontinua luta maka’as to’o ohin loron bele konkista fatin iha sosiedade.

“Ita-boot sira haree ami sira tur iha ne’e, uluk labarik hanesan ita-boot sira, ami luta maka’as los iha kondisaun ambiente diferente ho difikuldade tomak para ohin ida-idak konkista nia fatin iha sosiedade no bele kontribui ba dezenvolvimentu ita-nia nasaun nia, ne’e ko’alia kona-ba responsabilidade ne’e ida-idak nian, responsabilidade Governante sira-nian, responsabilidade profesór sira-nian, responsabilidade inan-aman nian mak liliu responsabilidade oan sira-nian”, hatete nia.

Maibé atu prepara lideransa nasaun nian ne’ebé di’ak iha futuru mai tenke hahú agora, tanba Timor-Leste presiza Prezidente Repúblika ida di’ak, Primeiru Ministru, Ministru, tékniku no profesór ida di’ak.

“Sira ne’e ita hahú prepara agora, e ha’u-nia oan estudante sira ita-boot sira seidauk hatene imi ba ne’ebé, to’o loron ne’ebé imi hatene afinál ha’u to’o, ha’u sai profesór, ha’u sai Prezidente, ha’u sai Pilotu, ha’u sai enjiñeiru, ha’u sai Ministru”, afirma nia.

Tanba ne’e, hanesan Governu, iha responsabilidade kria kondisaun hothotu hodi bele kontribui ba aprendizajen estudante sira-nian atubele prepara rekursu umanu ne’ebé kualifikadu iha futuru mai, maibé ne’e mós filafali ba estudante ida-idak oinsá aproveita másimu tempu eskola.

Xefe Governu mós husu ba inan-aman sira atu iha responsabilidade mós tau matan ba estudante sira wainhira sira fila ba uma hodi enkoraja oan sira estuda no lee, envés lakon tempu ba telefone no mídia sosiál sira.

Ho programa sira ne’e bele kontribui ho  profesór sira-nia esforsu kontribui ba alunu sira-nia esforsu hodi ajuda estudante sira konkista nia espasu, nia fatin konkista nia futuru iha tempu oin mai.

“Ha’u la haluha lori VIII Governu nia naran agradese ita-nia parseiru dezenvolvimentu sira, ne’ebé prezente iha-ne’e, ne’ebé kontribui ba servisu todan no serbisu boot hodi tau matan ba ita-nia ona feto no mane para sira bele hetan futuru ida di’ak”, afirma nia.

Enkunatu profesór sira kontinua tau matan ba estudante sira, inan aman sira labele haluha dudu enkoraza oan sira atu aprende, tanba ohin loron estudante sira barak, mak lakon tempu iha televizaun, lakon tempu iha Facebook, lakon tempi iha jogu.

“Haluan katak ita ne’e bele na’ok nia tempu maka’as liu e perturba ninia jornada ba oin, entaun konsentra ba imi-nia estudu, uluk ha’u sei prezidente ha’u lansa liafuan ida ba estudante sira, ‘estuda, estuda, estuda, mate no dukur iha livru nia leten’ ha’u espera imi halo ida-ne’e”, dehan nia. (*)