Print this page

Maromak nia Domin Lori Mane Mesak Gregório Sai Amu Lulik

Padre (Pe.) Gregório Crisostómo Haendel Assis Correia. Padre (Pe.) Gregório Crisostómo Haendel Assis Correia. Foto Suplay

Tempotimor (Baukau)-Padre (Pe.) Gregório Crisostómo Haendel Assis Correia, hanesan oan mane mesak, maibé deside-an sai amu lulik, tanba domin Maromak nian.

Oan mane mesak husi domin Crisostómo Correia no Tereza Guterres, ne’ebé deside sai amu lulik, tanba maromak hadomin nia atubele haklaken nia liafuan ba ema seluk iha Mundu.

“Sai amu lulik ne'e tán grasa boot ida husi Domin Maromak nian, ita kolabora de'it ho Maromak, serto tradisaun Timor nian, inan aman la aseita oan mane mesak sai amu lulik, maibé tanba Maromak hadomi ita, klaru nia duni ita, nia hakarak ita tuir nia nafatin, nia fiel bolu ita nafatin oinsá para ita loke laran ba nia, hodi kolabora ho nian, ba ha'u mane mesak sai amu lulik, Maromak mak hadomi ha'u, ha'u tuir nia bolu domin ne'e ha'u fahe mós ba ema seluk”, dehan Padre (Pe.) Grigório Correia hafoin realiza agradesementu iha Kollejiu Fatumaka-Gariuai, sábadu (30/07).

Husu família atu mantein moris ho unidade hodi simu Jesus Kristu nia domin, tanba Maromak bolu nia oan mane ida atu sai amu lulik hodi servi uma kreda katólika, Jesus Kristu sei taka hikas nia horik fatin iha família.

Sai amu lulik presiza iha korajen moris tuir domin Jesus Kristu nian hodi partilla domin Jesus Kristu nian ba joven sira hodi moris tuir kristu nian, tanba dadaun mundu tama ona ba sekulu XXI era dijitalizasaun nian fiar ba Maromak hahú mihis.

Crisostómo Correia hanesan aman ba Gregório Crisostómo Haendel Assis Correia hatete, dezisaun ne'ebé oan hili sai amu lulik hodi servi uma kreda katólika, tanba dezisaun Maromak nian.

“Ha'u la triste nia sai amu lulik, tanba buat hotu ita hala'o iha ita-nia kna'ar ne'e tuir planu Maromak nian, tanba ita ho Maromak la hela mesak iha mundu ida ne'e, tán ida ne'e mak nia sai misionáriu ha'u korajen husik nia atu servi povu husi tasi feto to'o tasi mane, husi rai laran no rai liur”, hatete nia.

Padre Gregório Crisostómo Haendel Assis Correia ne’ebé moris iha loron 17 fulan-jullu tinan-1988, husi uma lisan Samaliurai Liabala Venilale, oan dahuluk husi Crisostómo Correia no Tereza Guterres ho feto na'in-2.

Padre Gregório hahú nia estudu iha eskola primária katólika Dom Bosco Fatumaka husi tinan-1995 remata iha tinan-2001 no kontinua estudu estudu pre-sekundária iha eskola katólika Aspirantadu Beato Filipe Reinaldo Venilale husi tinan-2002 to'o 2005, iha tinan-2006 kontinua estudu sekundária nian iha eskola Assales Fatumaka remata iha tinan-2008.

Maibé iha tinan-2009 deside haklean liután vida salesianu nian tuir formasaun nu’udar pré-novisiadu iha Dom Bosco Lautein durante fulan-9 nia laran.

Iha tinan-2010 deside hala'o novisiadu ikus hetan admisaun husi meastru novisiadu, iha tinan-2011 to'o 2013 hala'o tán formasaun pós-novisiadu iha Artemide Zatti Komoro, Dili.

Hafoin remata formasaun iha Dili, simu obidénsia tirosinante iha Salesiana Pioares da Régua Portugal, tanba Maromak nia profeta iha tinan-2016 deside halo profisaun perpetua iha igreja paroquial Dom Bosco Mirandela Portugal.

Husi tinan-2017 to'o 2022, kontinua tán hala'o estudu iha Instituisaun Superior Teológico Évora Portugal, to'o simu ordenasaun Presbiteral tula liman husi Bispo Dom Joaquim Mendes, SDB iha igreja paroquial São João Bosco Portugal. (*)

Rate this item
(2 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items