“Feria do livre ida-ne'e nia objetivu la'ós de'it ba labarik sira, ne'e ba sosiedade tomak, tanba sosiedade timorense ladun lé, haree took tanba imi jornalista balun, eh mídia sira, se ema hothotu gosta lé ne'e jornál mós sempre produsaun boot liután, agora ema ladún lé e sosiedade ita-nia ladún, jornál sira se mak lé”, dehan PR Horta iha seirimónia lansamentu ba feria livru, Palasiu Prezidensiál, Bairo Pite, sesta (15/07).

Tanba ne'e, feria ba livru ida-ne'e ho objetivu prinsipál mak oinsá mak atu hamamar labaril estudante no sosiedade sira-nia kapasidade atu gosta lé leitura.

Mesmu nune'e, situasaun ne'e la'ós akontese iha de’it iha Timor-Leste  maibé mós  akontese ba labarik iha mundu, falta ámbitu no kultura ba leitura, tanba ne'e féria ba livru ida-ne'e oinsá buka interese ba leitura.

Iha ne'e, Xefe Estadu haree katak dala-ruma sosiedade ladun lé tanba iha dezafiu ba presu husi livru maibé estadu no Governu tenke haree halo livru ne'ebé mak asesivel ba ekonómia sosiedade sira-nian.

“Sé livru karun, ema keta hanoin atu gasta osan ba fós ruma, ho livru ka, klaru kee nia tenke sosa fós,  tanba ne’e primeiru livru tenke adaptadu ba labarik sira no ema nia ekonómia siknifika produsaun livru sira labele karun”, hatete nia.

Feira Livru (O Livro é uma Janela para o Mundo) sai mós dalan ida ba dezenvolvimentu setór edukasaun hanesan pontu importante ida atu prepara rekursu umanu ho kualidade no matenek hodi kontinua dezenvolve Timor-Leste ba futuru hodi opta polítika ida de’it iha setór edukasaun katak “Edukasaun Universál ba ema hotu” hanesan hakerek nanis ona iha Konstituisaun RDTL, Artigu 59.

Maske Governu liuhusi Parlamentu Nasionál kada tinan sempre aprova orsamentu tuir nesesidade setór edukasaun nian tuir planu programa prioridade husi Ministériu Edukasaun rasik, liliu dezenvolvimentu infraestrutura eskolár, formasaun Profesór sira no seluk tan.

Tanba setór edukasaun mak hanesan xave ba dezenvolvimentu iha futuru mai nune’e, Prezidente Repúblika,  José Ramos Horta rasik mós hato’o iha nia diskursu wainhira selebra loron Restorasaun Independénsia 20 Maiu 2022 katak, dezenvolvimentu setór edukasaun mós sai prioridade ida hanesan ho prioridade sira seluk durante mandatu Prezidente Repúblika tinan lima mai.

Maibé atu garante kompromisu Prezidente Repúblika nian ba área edukasaun, mak Assessoria ba asuntu Edukasaun nia prepara planu programa “Feira do Livro” hanesan programa inisiál ida hodi korresponde ba kompromisu ne’ebé hola parte ba loron atus-ida (100) servisu Prezidénsia Repúblika nian iha área Edukasaun nian.

Programa “Feira do Livro” hetan mós  aseitasaun husi Prezidente Repúblika, nune’e Assessoria ba asuntu edukasaun ne’ebé lidera husi Asesóra Dulce de Jesus Soares ho ekipa realiza kedas reuniaun maratona hamutuk ho parseiru xave sira ba implementasaun programa Feira do Livro ne’e.

Husi programa Feira livru ho tema: “O Livro é uma Janela para o Mundo” ne’e sei implementa iha ámbitu loron komunidade CPLP nian. Programa ne’e sei hala’o iha Jardin Palásiu Prezidensiál, durante loron rua no sei hahú iha tuku 3 lokraik, loron 15 to’o loron 17 fulan-Jullu tinan 2022.

 Eventu Feira do Livro mós sei aprezenta livru ho títulu oinin no livru hirak ne’e mós sei promove ho lian ofisiál Tetun no Portugéz, ne’ebé sei oferese husi ajénsia no pesoál sira ho folin baratu, nune’e públiku sira liliu estudante no komunidade eskolár sira bele iha kbi’it hodi sosa.

Iha programa Feira do livro rasik mós bele promove talentu estudante sira-nian durante feira ne’e la’o liuhusi aprezentasaun múzika, dansa, poezia no seluk tan husi eskola hirak ne’ebé indika tiha ona husi Munisípiu Dili, Aileu, Likisá no Manatuto no ba futuru sei abranje ba munisípiu sira hotu. (*)