Projetu dekretu-lei ne’e aprezenta direita husi Ministru Edukasaun, Juventude no Desportu, Armindo Maia no Sekretáriu Estadu Juventude no Desportu, Abrão Saldanha.

“Projetu Dekretu-Lei ida-ne’e hodi revoga Dekretu-Lei númeru 39/2011, loron 21 fulan-setembru, ne’ebé regula KND no kria estrutura foun no enkuadramentu ba KND nian, nune’e mós delimita ninia kompeténsia sira, kompozisaun no funsionamentu hodi kontinua ho prosesu dezenvolvimentu prátika desportiva iha Timor-Leste”, dehan Ministru Prezidénsia Konsellu Ministru (MPKM), Fidelis Manuel Leite Magalhães, iha Palásiu Governu, kuarta (06/07).

Nune’e mós halo alterasaun dahuluk ba dekretu-lei númeru 18/2019, loron 11 jullu, ne’ebé aprova ona orgánika SEJD.

“Projetu Dekretu-lei ida-ne’e ho objetivu atu adekua Orgánika Ministériu ida-ne’e nian ne’ebé estabelese ona iha Dekretu-lei númeru 30/2020, loron 29 fulan-jullu, kona-ba organizasaun administrasaun direta no indireta Estadu nian”, epslika nia.

Aleinde ne’e, hakarak mós adekuada ba prosesu dezkonsentrasaun no desentralizasaun ne’ebé la’o hela, hodi promove autorizasaun ida entre responsabilidade no kompeténsia administrativa sira ne’ebé pertense ba servisu sentrál sira husi SEJD.

Prevee mós ezisténsia diresaun jerál ida-de’it ba juventude no desportu, reestruturasaun no agrupamentu ba unidade no diresaun nasionál balun. (*)