Tuir informasaun ne’ebé www.tempotimor.com asesu iha pájina UNICEF Timor-Leste, sesta (10/06) katak, Konferénsia APREMC II ne’e ko-organizadu husi eskritóriu UNESCO ba Rejiaun Asia no Pasífiku ba Asuntu Edukasaun no eskritóriu UNICEF ba Rejiaun Asia Pasífiku no Asia Súl.

Konferénsia ne’e ko-organizada husi Ministériu Edukasaun Tailándia no organizadu iha kolaborasaun ho Ministériu Edukasaun, Kultura, Desportu, Siensia no Teknolojia husi nasaun Japaun.

Ba delegasaun Timor-Leste lidera husi Ministru Edukasaun, Juventude no Desportu, Armindo Maia, akompaña husi funsionáriu senior ida husi Ministériu Edukasaun, Juventude no Desportu no Xefe Edukasaun UNICEF Timor-Leste, Ameena Mohamed Didi.

Iha loron 6 Juñe 2022, Ministru Armindo Maia, partisipa iha diskusaun meja redonda hodi diskute polítika no estratejia hodi garante returnu seguru alunu sira ba eskola no rekuperasaun efetiva ida husi aprendizajen ba alunu sira hotu.

Iha diálogu polítika ida ne’e identifika área xave ba asaun no polítika rekomendasaun rekuperasaun hafoin COVID-19.

Partisipante sira iha konferénsia APREMC II ne’e adopta ona Deklarasaun Bangkok 2022 ne’ebé emfaze nesesáriu urjente kona-ba reimajina no transforma edukasaun ho nia sistema atu sai ekitativu liu, inkluzivu, relevante, flexível no resiliente, hasoru krizi aprendizajen atual, hari’i sosiedade pasífika inkluzivu no sustentavel, no realiza ODS 4.

Tanba ne’e, iha Prioridade oioin ne’ebé mak identifikadu ba Rejiaun Asia no Pasífiku ninia. (*)