Iha serimónia Graduasaun ba dala-XXV, graduandu sira mai husi Fakuldade Edukasaun Arte no Umanidade, Departamentu Ensinu Fiziku no Desportu hamutuk 54 iha nível basarelatu.
Ba graduandu Mestradu sira iha área Ekonomia Jestaun Aplikadu, Administrasaun Edukasionál, Língua Portugés, Espesialidade Direitu Privadu, Direitu, Ekonomia Kontabilidade, no Polítika Jestaun Avaliasaun Edukasionál.
Nune’e mós Pos-graduasaun sira ne’e iha área Kontabilidade, Medisina Espesialidade Famíliar, Cirurgia, Klínika Médiku, Jestaun Sustentavel Rekursu Naturál Ambiente, Saúde Komunitáriu, Servisu Sosiál, Ensinu Portugés, no Matematika Profesór, no Ekonomia Jestaun Aplikada.
“Totál graduandu husi pos-gradusaun hamutuk na'in-hitunolu-resin-haat (74), mestradu hamutuk na'in-sia (9), totál hamutuk 83 graduandu no Fakuldade Edukasaun Arte e Umanidade (FEAH), Departamentu Ensinu Edukasaun Fízika Desportu iha Basarelatu hamutuk 54 graduandu”, esplika Magnífiku Reitór UNTL, João Soares Martins, iha Sentru Konvensaun Dili, Merkadu Lama, tersa (07/06).
Graduada Guirlhemina Filomena Saldanha hatete, sente kontente tebes husu mós parabéns ba maluk hotu ne'ebé graduandu.
“Loron ida ohin la'ós de'it ba ami graduandu maibé husu mós ba joven sira hotu, bele tuir ami-nia dalan hodi hala'o estudu”, hatete nia.
Tanba ne’e, husu mós ba joven atu esforsu nafatin para loron seluk bele hetan oportunidade hanesan hodi kontinua estudu iha ensinu superior sira.
“Ami sira ne'e idade avansadu, ami enkoraja no insentiva joven sira, iha parte seluk Governu mós sei fó insentivu ba alunu sira”, dehan nia.
Nune’e joven sira tenke aproveita tempu ho didi'ak atu hetan mellór klasifikasaun husi universidade ida.
Diretór Ezekutivu Ajensia Avalisaun Akreditasaun Nasionál Akademika (AAANA), Edemundu Veigas hatete, departamentu ensinu fízika deportu hetan ona akreditasaun husi AAANA ho valór C, liuhusi avaliasaun ne’ebé halo iha tinan 2021.
“Iha tinan 2021 ami ba halo avalisaun akreditasaun rezultadu hatudu katak sira konsege hadi'a ona painel Avaliasaun AAANA nia rekomenda ba sira”, esplika nia. (*)