Diretór EBC Palaban, Viçensio Cono hatete, fasilidade ne’ebé mak laiha hanesan edifísiu la sufisiente, kondisaun eskola la di’ak inklui bee-moos ne’ebé efikulta tebes ba estudante sira-nia programa merenda eskolar.

“Preokupasaun ne’ebé mak ami enfrenta iha EBC Palaban ne’e mak hanesan Bee-moos, edifísiu eskola la sufisiente, profesór la sufisiente, kondisaun eskola la di’ak ho ida ne’e defikulta tebes ba ita-nia estudante sira-nia atividade eskola nian”, dehan nia liuhusi telefone, tersa (24/05).

EBC Palaban enfrenta bee-moos desde iha tinan 2014 mai to’o agora maibé Governu la tau matan, ho ida ne’e kada semana profesór sira tau osan hamutuk hodi sosa bee litru 8.000 ho orsamentu $20, atu nune’e estudante sira bele assesu ba merenda eskolar, inklui enxe ba haris fatin.

Diretór Edukasaun Munisípiu Vikeké, Emidio Amaral informa, Eskola 2 iha Munisípiu Vikeké to’o agora seidauk iha kadeira no meza ba estudante sira.

“Ita-nia eskola 2 hanesan ESG Sabiken no EBC Uatukarbau ne’e desde 2013 sira laiha kadeira no meza, ho ida ne’e defikulta tebes sira-nia prosesu aprendizajen, tanba estudante na’in-2 tur hamutuk kadeira ida no meza ida hodi tuir prosesu aprendizajen”, hatete nia.

Ho ida ne’e, hato’o ona proposta ba Ministériu Edukasaun Juventude no Desportu (MEJD) maibé to’o agora seidauk responde, no sira nafatin hein, atu Governu bele fasilita kadeira no meza balun ba estudante sira. (*)