“Arte Moris nu'udar eskola no hari’i sentru kulturál artista sira-nia ba dahuluk iha Timor-Leste, konstitui motor fundamentál ida ba impulsionamentu no valorizasun ba movimentu kreativu artistiku sira hamutuk ho kámara joven sira. Prezidénsia ne'e kompromete nia-an atu viabiliza forma akomoda Arte Moris no grupu artistiku Timoroan sira seluk iha estrutura foun ne'ebé sei hari’i hamutuk ho Palásiu Prezidensiál”, dehan Sekretáriu Estadu Kooperativa (SEKOOP), Elizário Ferreira ne'ebé lee Diskursu PR, José Manuel Ramos Horta iha Estadium Munisípál Vikeké, sesta (20/05).

Prezidente Repúblika promete sei kontinua filafali inisiativa oioin sira ne'ebé iha muda mandatu uluk, atu promove revitalizasaun iha nível nasionál sira liga ho arte no kultura sira.

“Durante Prezidénsia ida ne'e sei lansa filafali inisiativa sira oioin ne'ebé manán popularidade durante ha'u-nia mandatu ida uluk no ne'ebé iha hanesan objetivu atu promove revitalizasaun iha nível nasionál iha área sira hanesan árte no kultura, desportu no protesaun ambientál ho kolaborasaun estreita hamutuk ho setór governamentál relevante sira”, esplika nia.

Alende ne'e Tour de Timór, Dili Internationál Marathon, peska Desportu festival kulturál no múzika Ramelau Festival sinema no inisiativa Desportu no kulturál sira seluk sei reativa filafali.

Iha ne’e sei promove atividade komunitáriu sira ba saneamentu limpeza ba sidade sira iha Munisípiu sanulu resin-tolu (13) nune'e mós programa espesífiku sira ba edukasaun ambientál, iha finál kada tinan iha selebrasaun kuadru natalisia, sei filafali mós atu patrosina konkursu prezepiu sira ne'ebé populár tebes, hanesan estímulu ba kreativu hamutuk ho komunidade sira.

Tanba sai nu'udar nasaun ida ho populasaun joven barak Juventude sira tenke iha vizaun progressu no modernizasaun nasaun ne'e nian.

“Ha'u apela ba ita hotu atu mantein mehi no espirassun sira ita-nia Juventude nian iha ita-nia fuan. Ho sei investimentu seriu iha ita-nia Juventude ita sei bele garante dezenvolvimentu estabilidade no unidade ne'ebé nasaun ne'e presiza tebes”, haktuir nia.

Prezidente Repúblika mós aposta ba aliansa vitál entre Juventude kultura no identidade nasionál. Tanba Kultura labele eziste sein iha konsi’ensia ne'ebé apuradu ba identidade, vinkulu ba orijen komunidade ida ba territóriu ida, ereditariedade ida no istória ida.

Ho ida ne’e, nu'udar prioritáriu katak, Juventude Timoroan hatene revíndika ninia identidade nasionál hodi selebra liuhusi Kultura ne’ebé eziste dadaun. (*)