“Serbisu hamutuk ho CPA nu'udar reprezenta kompaña de jesus, esplika tiha ona katak, iha relatóriu Chega nian ne'e halo rekomendasaun banhira área Edukasaun nian, no komponente Edukasaun barak loos, maibé iha programa VIII Governu, husu ba CNC atu oinsá mak introdusaun konteudu relatóriu Chega ne'e iha kurikulu de Ensinu”, hateten Diretór Ezekutivu Centro Nacional Chega (CNC), Hugo Maria Fernandes, iha Edifísiu Centro Chegal Antigo Komaraka Balide, segunda (16/05).

Tanba ne’e CNC halo husi programa Edukasaun formál ho Ministériu Edukasaun, nune'e mós buka parseira sira ne'ebé mak bele apoiu CNC, liliu apoiu Governu nia programa, hodi halo fasil relatóriu Chega ne'e atu ema bele hatene.

“Nune'e iha tinan haat nia laran ami halo maneira oioin, ho nível instituisaun oioin de'it, no ami hanoin katak, importante mós halo relatóriu ne'e hodi sai fasil ba alin estudante sira’, esplika nia.

Entaun husi parte sira halo parseiria ho CPA, ho fiar ida katak, ho produsaun vizual, liuhusi audio ho filmajen kartum, ho ida ne'e, bele tulun tebes estudante sira liliu sira ne'ebé mak iha eskola Primaria no Sekundária, dalaruma mós Universidade sira hodi hatene loloos saida mak relatáriu Chega nia konteudu.

“Ha’u hanoin CNC hakarak hato'o ami-nia haksolok no parabéns ba kooperasaun ida ne'e, ne'ebé mak CPA responde ona CNC nia konvite, hodi apoia CNC iha produsaun vídeo kartum ba livru relatóriu CNC versaun popular nian. Ida ne'e nu'udar Projeitu ida oinsá mak atu fornese informasaun ba públiku liliu ba it-nia alin sira ne'ebé mak sei iha hela eskola Primaria, sekundária nomós públiku em jerál, kona-ba konteudu relatóriu Chega nian”, afirma nia.

CNC hanoin importante mós produsaun iha relatóriu ne'e ho versaun kartum liliu ba konsumu estudante sira nian, ne'ebé mak dalaruma relatóriu Chega nian todan liu atu lee, iha versaun ne'ebé mak nakonu iha livru ne'e, no versaun popular, ida mak transformasaun husi livru ba fali versaun Vídeo atu nune'e, públiku em jerál bele intende di’ak liután saida mak konteudu relatóriu Chega nian.

Ba produsaun video ne’e ho montante orsamentu rihun-6-resin, maibé konsidera la boot liu dedikasaun ne'ebé mak CNC ho CPA halo atu oinsá kria sosiedade ninia solidade, sosiedade ne'ebé mak respetu diretu Umanu.

“Ha’u hanoin kustu ida ne'e, kuandu kompara ho efeitu, saida mak ita espera husi inisiativa ida ne'e, laiha buat ida, ba oin planu depois de produsaun ne'e mai CNC, nune'e mós CNC iha parseiru ho Rádiu Televizaun Timor-Leste (rTTL), iha kanál ne'ebé mak tau iha ne'eba, nune'e sei transmite husi RTTL”, esplika nia.

Diretór Ezekutivu CPA, Rui Muakandala haktuir, nota entendimentu ne'e, husi sira atu iha tan fulan rua ou tolu nia laran, atu entrega ona CNC.

“Entaun ami-nia serbisu komesa tiha ona, husi hakerek, no livru ne'ebé fornese husi CNC, nune'e mós iha fulan rua ou tolu hanesan ne'e, ami bele termina ona ami nia rezultadu iha CNC”, dehan nia. (*)