“Bíblia hatete sala ne'ebé halo ita-nia klamar sai moras mak lakohi halo tuir Na'i Maromak nia liafuan, bainhira ita la halo tuir ita sente todan loos ita haree ema seluk di'ak no ema seluk haree ita di'ak mais ita sente todan loos”, esplika nia liuhusi pregasaun ba Kristaun sira iha Igreja Assembleia de Deus, iha Vilaverde, domingu (14/05).

Iha Kultu Pregasaun ne'e pastór foti iha Evangellu Mateus 9:9-13 ne'ebé hateten, "Depois Jesus husik tiha fatin nee. Nia lao dadauk, Nia hetan ema kobrador impostu ida naran Mateus, tuur hela iha nia servisu fatin. Jesus dehan ba nia, “Mai tuir Ha’u!” Mateus mós hamriik hodi tuir Jesus. Depois Jesus ho Nia eskolante sira ba hán iha Mateus nia uma, e kobradór impostu barak ho ema aat sira seluk mai hán hamutuk ho sira. Ema husi grupu Farizeu sira haree, e sira husu ba Jesus nia eskolante sira, “Nusaa mak imi-nia mestre hán hamutuk fali ho kobradór impostu ho ema aat sira ne’e?” Maibé bainhira Jesus rona sira-nia liafuan ne’e, Nia dehan, “So ema moras mak presiza doutor, ema isin di’ak la’e. Ba aprende didi’ak Maromak nia liafuan ne’ebé dehan, ‘Ha’u hakarak atu imi hatudu laran di’ak ba malu. Se la’e, imi lori sakrifisiu fó mai ha’u mós laiha folin’. Ha’u mai atu bolu ema aat sira, la’ós atu bolu ema ne’ebé konsidera nia-an moris loos ona”.

Tanba ema moras fíziku doutor bele kura, maibé ema ne'ebé moras espíritu so ema ne'ebé simu Jesus mak bele kura.

Alende ne'e mós ema primitiva ne'ebé mak Maromak kria mós uluk komete sala hotu nune'e nia mós hetan moras espiritual mak Adaun no Eva mós labele obedese Maromak nia regra, no Kristaun sira ne'ebé maka la halo tuir mós klamar moras, nomós fatin ne'ebé Kristaun sira hela ba mós bele kria klamar moras ba nia.

Nune’e mós ba ema ne'ebé halo sala nia rekoñese nia sala Maromak sei fó perdaun ba ema nia sala.

“Tanba ne'e mak ema moras klamar so Maromak bele kura so Maromak mak bele fó solusaun, doutor ema labele hatene so nia halo tratamentu ba ema moras fíziku”, dehan nia.

Tanba Bíblia hatete iha Mateus 11:28 "Imi ne’ebé kole, imi ne’ebé loroloron lori naha todan, mai iha ha’u, e ha’u sei halo kama’an imi-nia todan’, haktuir nia.

Nune'e nia hameno ba Kristaun sira katak kontinua halo tuir Maromak nia liafuan hodi foti desizaun ho firmeza hodi labele kria moras klamar ba Kristaun ida-idak nia moris. (*)