“Ho onra no orgullu boot mak ha’u kondekora ba dala ikus liu, ho naran Estadu Timor-Leste, veteranu luta libertasaun nasionál, ne’ebé reziste entre tinan 15 no tinan 19 liuhusi dalan oioin no ho ida-idak nia kbi’it rasik, hodi tanen ita-nia mehi boot atu afirma-an iha mundu, nu’udar Nasaun no Povu ida ho identidade rasik, hamutuk hotu sobreviventes neennolu-resin-neen (66) no saudozu sanulu-resin-hitu (17)”, dehan Lú Olo hafoin hala'o serimónia kondekorasaun iha palásiu Prezidensiál, Bairopite, segunda (16/05).
Husi kondekorasaun ida ne'e sai hanesan rekoñesimentu ida husi Estadu Timor-Leste nian ba sira-nia luta nomós fó valorizasaun nu’udar erói no eroína nasionál.
Maske nune'e, Kombatente Libertasaun Nasionál Luta Armada-Frente Interna, rejistadu no validadu, ne’ebé tuir lei, klasifika nu’udar veteranu, dadauk simu hotu ona rekoñesimentu no valorizasaun husi Estadu Timor-Leste.
Ho ida ne'e, Prezidente Republika ho orgullu boot tanba Estadu organiza solene ida hodi rekoñese no valoriza kombatente libertasaun nasionál liuhusi kondekorasaun Orden Timor-Leste, grau Colar. Maibé Estadu fó mós protesaun ba sira-nia dependente sira, oan kiak no faluk sira.
Iha ne'e, Estadu mós hatene ninia obrigasaun husi kedas loron restaura indepedénsia nasionál, iha 20 maiu 2002 no Bazeia Artigu 11 husi Konstituisaun RDTL hatete “Estadu asegura protesaun espesiál ba mutilados de guerra, órfauns no dependente sira husi luta-nain sira ne’ebé fó sira-nia vida ba luta independénsia no soberania nasionál no proteje hothotu ne'ebé partisipa iha rezisténsia.
Tanba ne'e, to’o ohin loron mos Estadu nia apoiu ba Kombatente Libertasaun Nasionál konkretiza liuhusi subvensaun públika ne’ebé fulan-fulan fahe ba kombatente libertasaun nasionál sobreviventes no família mártir sira-nian tuir validasaun ba ida-idak ninia partisipasaun iha luta libertasaun nasionál.
Aleinde Hari’i Jardin Erói Pátria-fatin ida ne’ebé sai sentru permanente omenájen ba sira no ne’ebé tama ona iha roteiru turístiku-istóriku no edukativu ba vizitante sira no jerasaun hothotu ohin loron no ba aban bairua.
Enkuantu Estadu Timor-Leste fornese kaixaun no hakoi erói ho onra Estadu, iha Jardim dos Heróis da Pátria ka iha rate seluk tuir desizaun família nian, hari’i ekipa médika espesiál ida hodi tau matan ba saúde kombatente libertasaun nasionál no família sobrevivente no mártir sira-nian, fasilita asesu ba kréditu.
Nune'e mós fó ona subsídiu iha tinan 2020 no 2021 ba veteranu 20-24 anus hamutuk 116 hodi hari’i ka hadi’ak sira-nia uma, fó bolsas Estudu ba Kombatentes no mártir nia oan sira liuhusi Ministériu ba Asuntus Konbatentes Libertasaun Nasionál, husi ensinu báziku to’o universitáriu. (*)
