“Kona-ba difikuldade ne'ebé ha'u hasoru kondisaun eskola mak ladún di'ak liliu edifísiu eskola nian, tanba iha ne'e mesak edifísiu ida tempu Indonézia nian de'it, to'o agora seidauk iha, ida de'it mak foun UNTAET nia tempu mais restu ne'e mesak Gedung Indonézia nian de'it, ne'e ita dehan rai nakodoko dala ida edifísiu sira ne'e monu hotu ba rai”, dehan Koordenador Vicente ba www.tempotimor.com iha Suku Orlala, kinta (12/05).

Tanba ne'e Profesór nia rekomedasaun espesiál ba Ministériu Edukasaun atu hadi’a uluk, kondisaun eskola tanba durante ne'e la fó haksolok ba estudante no profesór sira.

“Ami Rekomenda deit ba Ministériu Edukasaun atu edifisiu sira ne'e ita tenke halo di'ak hotu mais kuandu edifísiu la di'ak ita planu halo buat hothotu di'ak mais fatin ida estudante ho profesór sira loroloron hasoru mak la di'ak, nune'e ladún fó haksolok ba mestre no estudante sira”, afirma nia.

Durante ne'e prezensa profesór ba estudante sira menus tanba profesór barak mak tuir kursu Portugés ne'ebé Ministériu Edukasaun oferese ba profesór sira.

“Difikuldade ne'ebé mak ami hasoru iha eskola ida ne'e mak ami prosesu hanorin ne'e la'o ka tuir ona matéria ida para to'o meudia ne'e laiha, tanba profesór sira iha ne'e barak tur hotu kedas kursu Portugés nian ne'ebé profesór barak mak envolve hotu kedas iha ne'ebá nune'e profesór la iha tempu atu hanorin matéria kompletu ba estudante sira”, haktuir nia.

Dadus eskola Ensinu Baziku Filiál Orlalan seidauk iha prosesu profesór ne'ebé akaba nível edukasaun lisensiadu maibé maihusi Banku Eskola Pre-Sekundária sira no Sekundáriu totál profesór hamutuk na'in-sanulu no estudante 251. (*)