“Ho globalizasaun ne’ebé mak ohin ita hasoru, ita tenke haree ba lia-portugés nu’udar vantajen ida ba jerasaun daudaun ne'e no jerasaun aban-bainrua nian”, dehan Lú Olo liuhusi komunikadu Imprensa ne'ebé www.tempotimor.com asesu kinta (05/05).

Ba komemoerasaun lian-portugés ne'e, nu’udar jerasaun foun iha devér atu promove no prezerva dalen ida-ne’e nu’udar dalan di’ak ida atu kaer metin nafatin identidade kulturál Timor-Leste nian nomós nu’udar lian barani ida ne’ebé hala’o nafatin ninia kna’ar hodi marka diferensa iha Ázia no iha mundu tomak.

Dadauk Lia-portugés kontinua buras ba beibeik iha Timor-Leste, tuir predisaun sensus ikus nian ne'ebé hala'o iha Timor-Leste, populasaun Timoroan hamutuk 30,8% resin ko’alia portugés.

Ho rezultadu ida-ne’e hatudu katak persentajen ema ne’ebé ko’alia lian ofisiál ne’e sa’e maka’as kompara ho 5% iha tinan 2002, hafoin Timor-Leste restaura ninia independénsia, no ida-ne’e sai hanesan prosesu rekonkista ida ne’ebé la’o neineik.

“Ida-ne'e ita deve liliu ba manorin sira tanba sira mak hanorin ita. Maske nune’e, ita presiza rekoñese katak ita sei dook liuhusi ita-nia objetivu”, afirma nia.

Tanba husu ba hothotu liliu ukun na’in sira atu aproveita selebrasaun loron 5 maiu kona-ba lian-portugés, hodi halo reflesaun hodi hanoin kle'an saida mak halo ona no saida mak presiza halo.

Nune’e husu ba Governu presiza haree oinsá tutan hamutuk Tetun ho Portugés, hodi hatuur lian-rua ne’e nu’udar instrumentu espresaun husi Povu no ninia identidade.

Tanba Timor-Leste dadaun moris iha konjuntura ida neʼebé nakonu ho dezafiu no inserteza ne’ebé boot ba beibeik. Maske populasaun ki’ik no territóriu ki’ik ida, maibé tenke fó kedas prioridade ba uza instrumentu hirak hodi hametin ita-nia karater úniku.

Haree husi asuntu ida ne'e, bele dehan Edukasaun sai importante tebetebes iha ambiente ohin loron nian tanba edukasaun mak sei determina futuru jerasaun.

“Nasaun ida nia rekursu ne'ebé boot liu hotu mak ninia ema. Hodi hametin kapitál umanu, ita presiza investe iha edukasaun. Edukasaun la’ós atu fakar osan, maibé hanesan investimentu ida, no karik ita investe iha kualidade, ita sei hetan retornu”, esplika nia. (*)