“Tempu agora ne'e satanas lohi ema kriatura hothotu iha mundu beik matenek riku ki'ak sai bosok ten tiha hotu, karik tama to'o Kristaun sira balun mós sai bosok ten, imi hotu la bosok”, hatete Pastór Apolinário Martins, liuhusi nia pregasaun iha Igreja Evangélica Assembleia de Deus IEAD Vilaverde, domingu (01/05).

Tanba Eskritura ne'e Apostolu Paulo dedika maka’as ba Timoteo, tanba Timoteo sai atan ida ne'ebé klosan hodi bele haree obra Maromak nian hodi kontinua serbisu ne'e, iha fali nia ko'alia ba Timoteo nune'e mós ko'alia mai mai Kristaun sira to'o ohin loron.

Versikulu ba pregasaun ninian mak mai husi (Segundu Timoteo 3: 13-17) maibé ema aat ho ema bosok-teen sira sei sai aat ba beibeik. Sira lohi ema, ema mós lohi sira. Maibé o tenke kaer metin nafatin buat ne’ebé o aprende tiha ona. O laran metin ona katak buat sira ne’e loos, tanba o hatene see mak hanorin ba o.  Komesa o sei ki’ik, o hatene ona Livru Sagradu. Husi Livru Sagradu ne’e, o hatene katak, Maromak salva o bainhira o fiar ba Kristu Jesus. Liafuan hothotu iha Livru Sagradu mai husi Maromak. Liafuan sira ne’e serve para hanorin ema, hatudu sai ema nia sala, korije ema, e eduka ema para moris loos. Ne’e hotu treinu didi’ak ema ne’ebé hala’o Maromak nia servisu atu sira bele halo buat di’ak oioin.

Pekadu nia hun mai husi Satanas ne'ebé mak uluk bosok Adaun no Eva hodi monu ba sala to'o mai ohin loron ema kontinua sala nafatin.

“Iha ne'e ohin hatete katak, ema ne'ebé mak aat, nia sei kontinua nafatin bosok e ninia bosok ne'e sei aat liután, se mak bosok ten, satanas ne'ebé bosok ita-nia ema primeiru Adaun no Eva, lori ba Pekadu lohi ho liafuan mesak furak sai sira na'in-rua monu”, hatutan nia.

Tanba ne'e mak Igreja Kristu ninian kontinua fó sai liafuan kondena pakadu sira hodi Kristaun sira labele monu ba sala sira. Tanba mundu agora, feen bosok laen, laen bosok feen, oan bosok inan aman, oan inan aman hamutuk bosok Maromak atan sira.

Maromak nia liafuan ko'alia no kurize maka'as ba Kristaun sira tanba Maromak hadomi nia povu sira, tanba tempu sei iha ba Kristaun sira, maibé kuandu to'o tempu maranata (Jesus fila mai mundu ba dalarua) la iha ona oportunidade ba sarani sira hodi husu perdaun. (*)