Print this page

Lú Olo Saúda Sidadaun Musulmanu Selebra Idul Fitri ho Laran Moos

Komunidade Musulmanu sira selebraloron Idul fitri iha Masjid Kampu Alor. Komunidade Musulmanu sira selebraloron Idul fitri iha Masjid Kampu Alor. Foto Suplay

Tempotimor (Dili)-Prezidente Repúblika (PR), Francisco Guterres ‘Lú Olo’, hato'o ninia sentimentu saudasaun ba sidadaun musulmanu iha Timor-Leste no iha mundu tomak tanba bele selebara loron idul fitri ho laran moos.

“Liuhusi mensájen ida ne’e ha’u hakarak saúda kompatriota musulmanu sira hotu, iha Timor-Leste no iha rai-liur, hafoin tuir faze Ramadhan ho ritual jejun durante fulan ida, maluk musulmanu sira selebra loron ohin ho laran moos tanba fase ona sala, perdua malu ona, halo ona rekonsiliasaun nu’udar família no nu’udar komunidade”, dehan Prezidente Lú Olo liuhusi diskursu ne'ebé lé sai husi Diretór Jerál Pálasiu Prezidensiál, Domingos Amaral, iha ámbitu selebrasaun loron Idul Fitri iha Salaun Masjid Anuur Kampu Alor, segunda (02/05).

Ho selebrasaun ba loron idul fitri ida ne’e, família uma laran sei haklean nafatin sira-nia domin no respeitu ba malu. Ho nune'e importante tebes ba Timor-Leste atu valoriza loron ida ne'e.

Prezidente Repúblika mós husu ba sidadaun ida-idak, atu fó nafatin lolo liman ba malu, nu’udar timoroan, no tane hamutuk prinsípiu no valór sira ne’ebé hametin nu’udar povu ida de’it, moris iha uma lisan boot ida de’it maka Timor-Leste.

Maske iha loron 19 maiu tuir mai, Prezidente Repúblika atuál sei termina nia mandatu maibé ida ne'e sei la hamate ninia misaun nu’udar servidór Nasaun no Povu Timor-Leste. 

Tanba ne'e, hamutuk nafatin ho kompatriota musulmanu ida-idak, tuir kbi’it no matenek ida-idak nian, atubele fó liman ba malu hodi hametin Estadu Direitu Demokrátiku, kuda pás no estabilidade, dezenvove rai ida ne'e oinsá mak hasa’e moris-di’ak ba Povu tomak.

“Hakuak boot espesiál ba komunidade musulmana iha Timor-Leste no mós iha Indonézia no rai sira seluk”, dehan nia. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items