Tanba loron 1 fulan-maiu tinan 2022, Mundu tomak no Timor-Leste selebra Loron Internasionál Traballadór nian, ne’ebé komunidade Katólika mós selebra nu’udar loron Saun José Operáriu nian, ho objetivu atu rekoñese no valoriza kna’ar Traballadór sira-nian iha sosiedade.

“Traballadór sira nu’udar eroi foun sira iha faze Dezenvolvimentu Nasionál daudaun ne’e nian no liuhusi sira mak ita hari’i Nasaun ida-ne’ebé Forte, Riku no Seguru”, dehan PM Taur iha pájina Primeiru Ministru ne’ebé www.tempotimor.com asesu iha loron domingu (01/05).

Ho loron Traballadór nian la’ós de’it feriadu ka loron deskansa nian ida, maibé sai nu’udar biban ida ne’ebé di’ak tebetebes atu hahí empeñu, méritu, dixiplina, profisionalizmu, serbisu iha ekipa, espíritu sakrifísiu nian no kumprimentu devér nian, ne’ebé horik nafatin iha traballadór sira, tantu nasionál nune’e mós estranjeiru sira, ne’ebé belar iha setór oioin husi ekonomia no administrasaun públika, ne’ebé kontribui maka’as ba produtividade no atu nasaun hakat ba oin iha ritmu ne’ebé di’ak.

Traballadór sai nu’udar bénsaun no rikusoin loloos ida husi família, komunidade, empreza, instituisaun ka nasaun ida, justu duni atu selebra ezemplu di’ak liu sira kona-ba serbisu no exelénsia, hanesan fonte enkorajamentu no inspirasaun nian hodi hasoru dezafiu sira husi dezenvolvimentu.

“Ba Traballadór Timoroan no Estranjeiru hothotu ne’ebé kontribui ho laran tomak ba Timor-Leste ida-ne’ebé modernu, dezenvolvidu no prósperu liután, ha’u hakarak tebes, hodi ha’u-nia nia naran rasik no Governu nia naran, hato’o ami-nia agradesimentu ne’ebé boot tebtebes”, afirma Taur.

Entreatntu Ministru Turizmu Komérsiu no Industria (MTKI), José Lucas do Carmo da Silva, fó parabens ba traballadór Timoroan no internasionál ba selebrasaun Loron Internasionál Traballadór nian. (*)