Diretór Servisu Edukasaun Munísipiu Baukau, Augosto Ornai Ximenes, hatete, servisu edukasaun realiza enkontru desiminasaun sirkulár nu.01 diresaun jerál administrasaun finansa liuhusi Ministéiru Administrasaun Estatál (MAE) kona-ba ezekusaun orsamentu merenda eskolar ne'ebé aloka husi autoridade Munisípal.
"Atu ezekuta di’ak, ohin ita konvida hahú husi pre-eskolar ensinu públiku no katóliku inklui komunitáriu hamutuk 209 ne'ebé sai hanesan benefisiariu," dehan Augusto iha salaun sentru konvensaun Baukau, sesta (22/04).
Programa merenda eskolar lolos iha Baukau implementa tiha ona inísiu tinan-2022 fulan-fevereiru, maibé kestaun levantamentu dadus tarde, tanba covid-19.
Nune'e, sei implementa iha loron 09 fulan-maiu tinan-2022 hafoin prosesu aprendisajem ba segundu trimestral hahú.
Orsamentu ba programa merenda eskolar aloka ona ba kada konta bankaria eskola loron efetivu 70 nian.
"Entaun depois deziminasaun ida ne'e, hahú dia 25 agora to'o dia 06 de maiu sira bele halo levantamentu ona, nune'e implementa ona ida dia 09," nia afirma
Problema ba implementa programa merenda eskolar mak, sana no tasu, maibé husi eskola balun Ministeriu Edukasaun Juventude Desportu (MEJD) rejolve ona.
Maibé, iha pré-eskolar foun sira sei iha problema ba sana no tasu, enkuantu problema dapur preukupasaun jerál.
"Atu antisipa dapur, iha enkontru anúal 2021, nune'e mós inisiu 2022 ita fó hanoin ona ba diretiva eskola sira atu kria kondisaun minima, konvida inan aman tau netik tali tahan ka kalen aat ruma taka netik para bele uza ba tein," nia hatete
Enkuantu estudante benefisiáriu ba programa merenda eskolar hamutuk 32.307, estudante na'in-ida kada loron prosesu aprendisajem nian sei hetan US$0,25 sentavós husi orsamentu ba programa merenda eskolar hamutuk US$714.187. (*)
