Tanba ne’e Igreja Kristaun iha loron Domingu (10/04), selebra loron ida ne’e sarani sira haoin hikas fali Jesus Kruistu tama iha sidade Jerusalem antes hedi iha Kruz. Antes hedi nia iha Kruz Jesus Kristu tama ba sidade Santa Jerusalem mak buat ida ne’ebé epesiál. Tanba ne’e mak Domingu Ramos mak abertura semana santa ne’ebé foka ba semana ikus Jesus iha Sidade Jerusalem. Iha liturjia Domingu Ramos emasarani sira simu Ramos tahan no igreja sira nakonu ho efeitu husi Ramos.

Nune’e Parokia Katedral Santu António Baukau hamutuk ho sarani sira iha Postu Administrativu Baukau Villa, Munisípiu Baukau, selebra misa Domingu Ramos hodi hanoin hikas livru Zakarias nian ne'ebé mak haktuir kona-ba jesus (liurai) nia fiar, wainhira tama iha Jeruzalem.

"Ohin, ita selebra ita na'in jesus kristu ne'ebé tama Jeruzalem, nu’udar liurai, akontesimentu iha domingu Ramos nian, fó hanoin mai ita kona-ba livru Zacarias nian, ne'ebé haktuir dehan katak, liurai nia fiar tama iha Jeruzalem”, dehan Administradór Apostóliku Dioseze Baukau, Padre Alipio Pinto Gusmão, iha selebrasaun Misa Domingu Ramos, iha Pároku Santu António Baukau, domingu (10/04).

Ho fiar Jesus Kristu nian ne'ebé tama iha Jeruzalem, sei ba foho Xions nian, ba haklaken Ramos hodi halo rahun situasaun funu nian, figura liurai Mesias ida ne'e, mak sarani hetan iha Jesus Kristu, ne'eb’e tama iha Jeruzalem.

Ihs momentu ne'eba, grupu rua ne'ebé ho reasaun ba Jesus ne'ebé nu’udar liurai tama iha jerusalen, grupu ida ne'ebé simu nia, ema rona iha Valmero dehan sira hakilar, hahí hananu, hodi dehan di'ak tebes ida bee mai hodi na'in nia naran.

Maibé mós iha grupu seluk ne'ebé rejeita no la simu Jesus nu’udar liurai, sira haruka Jesus atu hanoin ba nia eskolante sira, ema sira ne'ebé hakilar atu nonok.

“Tan ne'e mak Jesus hatan ba sira, sé sira nonok, fatuk sira ne'e sei hakilar, siknifika saida, iha tempu seison, buat hotu, ema hotu sei nonok, no rai klaran mak sei hakilar”, esplika Amo Alipio.

Ba ida ne'e, akontese de'it iha loron sesta-feira semana, iha tuku tolu lokraik wainhira Jesus iis kotu, iha ne'ebé rai nakdoko no loron matan lakon nia naroman, inklui buat hothotu hakmatek maibé natureza mak hakilar. (*)