Tempotimor (Baukau)‐Ministériu Edukasaun Juventude no Desportu (MEJD) halo mudansa ba orariu ezame periodu dahuluk anu letivu-2022 iha Munísipiu Baukau.

 Diretór Servisu Edukasaun Munísipiu Baukau, Augosto Ornai Ximenes, hatete, lolós realiza iha loron 18 fulan-abril, maibé elesaun Prezidénsial segundu volta, ne’ebé realiza iha loron 19 fulan-abril, nune'e MEDJ halo alterasaun muda ba loron 25 to'o 29 fulan-abril tinan 2022.

"Ezame primeiru periodu altera ba 25 até dia 29," dehan Augosto iha kna'ar fatin vila nova, tersa (05/04).

Matéria ezame ba kada eskola kuaze preparadu ona no hein atu implementa tuir oráriu, ne’ebé aprova husi MEJD.

Nune’e, husu ba estudante hotu iha Munísipiu Baukau hakmatek iha uma hodi estuda ka prepara aan ba ezame.

Tanba, politika MEJD nian dadaun, atu desidi valor estudante pasa ka lae ba kontinua estudu iha universidade, sei haree mós husi valor iha ezame periodu dahuluk.

"La'os ezame nasionál mak hakas aan estuda para pasa, maibé hahú husi klase 1 ne'e estuda ona, sé hakarak asesu ba universidade hahú estuda kedas agora, tanba agora atu asesu universidade públiku, bolsu hakbit, bolsu parsial, atu asesu ba rejime espesiál veteran, hotu-hotu haree ona valór, valór di'ak o ba, valór ladi'ak o hela," nia enkoraja

Tuir planu, hafoin remata ezame, mestri sira sei kontinua halo koreksaun ba kada matérial no prensementu valores estudante ba kaderneta iha loron 30 fulan-abril to'o loron 07 fulan-maiu tinan-2022.

MEJD halo ona multipikasaun no lansamentu distribuisaun ba kaderneta orijinál, maibé unidade avaliasaun dezenvolvimentu kurikulár seidauk transporta ba Munísipiu Baukau.

"Provizóriumente kaderneta ba sekundáriu jerál, tekníku vokasionál no ensiñu báziku mak reprezenta simu ona simbolikamente, maibé seidauk transporta mai signifika iha ona sentru de impresaun," nia argumenta

Kaderneta ba Munísipiu Baukau tinan-2022, estudante ensiñu sekundáriu jerál hamutuk 3.000 resin, tekníku vokasionál 300-resin, ensiñu báziku husi primeiru anu to'o nonu anu, pur-volta rihun 30. (*)