Diretóra Ezekutivu Fundasaun Uma Pas Baukau Felismena Belo, hatete, tinan-2020 rejistu kazu hamutuk 80-resin, númeru estudante mak barak, nune'e mós iha tinan-2021, FUB nafatin rejistu kazu hamutuk 96, maibé númeru estudante nafatin boot.
"Uma paz Baukau rejistu kazu violensia bazeia ba jeneru liu-liu vítima menor estudante, totál ba tinan rua liu ba ami nia databasse ne'ebé iha 75 pursentu labarik minor," dehan Diretóra Ezekutivu Fundasaun Uma Pas Baukau Felismena Belo, iha salaun sentru konvensaun baukau vila antiga, kuarta (06/04).
Númeru labarik feto mak sai vítima barak ba violensia seksual, violensia domestika kauza husi inan aman rasik mak baku no vítima ba abandona husi namoradu rasik.
Kazu refere, dadaun balun iha ona prosesu iha Tribunál, Ministéiru Públiku (MP) alende mós, suspeitu balun tama ona prizaun.
Tanba ne'e, FUP lansa programa edukasaun sivika kona-ba direitu umanus sidadania liga ho violensia bazeia ba jeneru ba estudante sira husi eskola ensiñu sekundáriu jerál (ESG-sigla portugés) nu.01 Tirilolo, hodi hatene salva gurda molok hakat ba komunidade (harii uma ka'in).
"Razaun tinan rua liuba, iha vítima ne'ebé ami identifika katak, iha eskola ida ne'e duni, (ESG Nu.01 Tirilolo Baukau), entaun proposta ami halo bazeia ba evidénsia ne'ebé ami rejistu iha databasse," nia afirma
Diretór Ensiñu Sekundária Jerál Nu.01 Tirilolo Baukau Paulo Dias Menezes, hatete, programa refere importante, tanba antes ne'e eskola ESG. nu.01 Tirilolo, nia estudante sempre hamosu violensia baku malu entre estudante iha resintu eskola.
"Iha ami nia eskola ne'e, relasaun seksual laiha, rejista de'it mak baku malu hanesan krime ne'e ami liga kedas ba komadante Polísia eskuadra Baukau," nia hatete
Kazu violensia mosu iha ESG 01 Tirilolo, haree kazu kaman, rejolve iha eskola, no kazu todan sei aprezenta tuir lei ne'ebé vigora.
Nune’e, liuhusi programa edukasaun sivika, estudante sira bele inteira hodi muda hahalok iha tempu prosesu aprendisajem.
Entertantu estudante husi eskola ensiñu sekundáriu jerál (ESG-sigla portugés) nu.01 Tirilolo, ne’ebé partisipa iha programa edukasaun sivika hamutuk 250 kompostu husi Mane no Feto. (*)
