Diretór servisu edukasaun Munísipiu Baukau Augusto Ornai Ximenes, hatete, orsamentu ba programa merenda eskolar tinan-2022 liuhusi Prezidente Autoridade Munísipal montante tuir metade kalendáriu loron efetivu hamutuk 178 estudante han iha eskola, maibé orsamentu tranferensia públiku kanaliza liuhusi PAM nune'e, aprova de'it loron efetivu 70.
"Osan ne'ebé ita aloka mai ne'e, ba benefisiáriu hamutuk 32,307, inklui fornesedór 240 ne'ebé sei tein ba ema hirak ne'e, entaun orsamentu totál ba fornesedór US$714.187 ne'ebé koloka liuhusi OJE 2022 ba Autoridade Munísipal Baukau, kada estudante sei han US$0,25 sentavus," dehan Augosto ba www.tempotimor.com iha salaun sentru konvensaun baukau vila antiga, kuarta (30/03).
Tuir kalendáriu Ministériu Edukasaun Juventude no Desportu (MEJD) programa merenda eskolár hahú iha fulan-fevereiru tinan-2022, maibé la realiza, tanba iha mudansa kalendáriu bazeia ba impaktu pandemia Covid-19.
"Prosesu tomak kalendáriu eskolar 2021 alterasaun lubuk ida, fó impaktu ba ínisiu anu letivu 2022 la'o tarde, prosesu rejistu alunus foun mós tarde fó impaktu ba levantamentu dadus, tanba hala'o programa merenda eskolár dadus mak sai baze," nia argumenta
Maibé, iha loron 28 fulan-marsu tinan-2022, diresaun edukasaun Munísipiu Baukau, realiza ona enkontru ho diritiva eskola atu implementa iha fulan-abril tinan-2022 bainhira Prezidente Autoridade Munísipal aloka ona orsamentu merenda eskolár ba konta bankaria kada eskola.
Levatamentu dadus, kestaun seluk mak eskola katólika hamutuk 8 ne'ebé tinan-4 ba kotuk la hetan programa merenda eskolar, iha tinan-2022 sei hetan programa refere, tanba bazeia ba orsamentu.
"Eskola foun sira ne'ebé atu tama programa merenda eskolár sira tenke prosesa konta bankária foun, ida ne'e mak fó impaktu ba prosesu," nia dehan
Benifisiáriu ba merenda eskolár tinan-2022 hamutuk ema na’in-32.307 husi eskola hamutuk 209 iha Baukau, ne’ebé kompostu husi eskola ensiñu pre-primaria 29, ensiñu báziku públiku 111 no ensiñu báziku Katólika 67. (*)
