“Ha'u fiar katak, atu sai líder, atu sai serbí buat ne'ebé mak primeiru tenke kona ema nia laran mak vontade atu serve entaun ita atu lidera ho serve entaun ita tenke serve uluk depois ita lidera entaun ho thema ida ne'e ha'u fiar katak joven sira ne'ebé hahú ho serve sira prepara sira-nia matenek hodi lidera ho mentalidade serve tuir Kristu nia hanorin”, dehan Pastor Dayan ba jornalista www.tempotimorm.com iha ámbitu Graduasaun ba estudante dala haat iha Igreja King Jesus Moviment (KJM), Fatuhada, sábadu (26/03).

Nune'e iha loron 26 marsu Gradua formandu hamutuk na'in-7 ne'ebé termina ona kursu durante tinan 2 nia iha IBTL rasik.

Tanba durante IBTL kontinua hanorin Maromak nia liafuan ba joven sira atu hadi’a nasaun Timor-Leste hodi nasaun ida ne'ebé di'ak.

“Iha objetivu mak atu dezenvolve abilidade sira, bele estuda Maromak nia liafuan, fó skills, hanesan lideransa ninian, hanesan dirije entaun ami-nia foku ba joven jerasaun foun, atu dirije ita-nia nasaun ba oin”, afirma nia.

Entretantu Formadu, Lorensu Soares, sente kontente, tanba aprende tan Maromak nia liafuan hodi aplika ba sarani sira relasiona ho materia hirak ne'ebé aprende ona.

“Ba ha'u sente katak, previlejiu ida ba ha'u hanesan formandu ida bele hetan koñesimentu bele hetan kursu teolojia hodi hatene Maromak nia liafuan tanba ema servidór ida hatene kle'an ida ne'e hodi haklaken hahán espirituál ba ema seluk liliu prepara ninia klamar atu hola parte iha reinu Maromak nian”, deklara nia.

Bainhira sai servidór tenke kontinua lee barak, medita, orasuan hodi nune'e Maromak nia espiritu hodi ajuda leno fó kapasitasaun, tanba atu sai lideransa atu ukun iha grupu ka Igreja ida.

“Atu sai lideransa la'ós ukun no fó de'it instrusaun maibé atu sevi sai atan ba ema seluk, tanba modelu ida ne'e Jesus hatudu nia domin fase nia eskolante sira-nia ain nia la'ós na'i maibé servidór ne'ebé sai atan ba ema seluk ne'e mak folin boot, ida ne'e mak líder ne'ebé serve maibé la'ós ukun”, afirma nia.

Ezisténsia IBTL hahú iha tinan 2017 ne'ebé iha misaun suporta no kapasita joven sira atu sira bele dezenvolve sira-nia servisu Ministériu ba joven sira ne'ebé mak iha koñesimentu atu serve Maromak iha ema ida-idak nia lokál Igreja. (*)