“Nota entendementu ne'ebé ohin Konsellu Impresa asina akordu ho Rádiu Televizaun Timor-Leste, Empreza Públika (RTTL,EP) nia objetivu atu kontinua programa talk show, ho títulu liberdade impresa mak ha'u-nia liberdade, ne'ebé durante tinan hirak nia laran hala'o iha RTTL,EP”, dehan Prezidente Interino Konsellu Imprensa, Expedito Dias Ximenes, iha salaun Konsellu Impresa, Kintál Boot, Dili, sesta (25/03).
Akordu ne'e atu kontinua divulga Konsellu Imprensa nia papél ho kna’ar prinsipál orgaun komunikasaun sosiál, tanba ema hotu hatene Konsellu Imprensa orgaun independente ida husi Estadu nian.
“Atu salva guarda hodi promove liberdade imprensa no espresaun, se ita haree ba kna’ar promove liberdade espresaun mak ohin asina akordu ho RTTL,EP ho ninia programa ida de'it mak liberdade imprensa mak ha'u-nia liberdade espresaun”, esplika nia.
Tanba ne’e, Konsellu Impresa konvida entidade ho Jornálista señior sira, editór ho diretór informasaun sira hotu, atu ba RTTL hodi esplika prosesu dezenvolvimentu mídia.
“Liuliu iha situasaun era dijitál, evolusaun teknolojia maka'as hanesan kompetisaun ida, ita bele dehan krítika mídia konvensionál, mídia plataforma dijitál ne'ebé oras ne'e daudaun la'o hela ne'e, tanba mídia hanesan fiár demokrasia importante”, esplika nia.
Ho RTTL hanesan mídia Estatál, povu no ema hotu nian, atubele fasilita lalais liu ho kustu baratu tanba ne'e Konseillu Imprensa durante ne'e hili ida ne'e, no la taka dalan ba mídia privadu sira hanesan televizaun no rádiu.
Prezidente Konsellu Administrasaun Rádiu Televizaun Timor-Leste, Empreza Públika (RTTL,EP), José António Bele ‘Taraleu’ hatete, renova asina MuO ho konsellu Impresa (KI) kona-ba programa liberdade imprensa mak ha'u-nia liberdade.
“Ami husi Rádiu Televizaun Timor-Leste, Empreza Públika (RTTL,EP), ohin mai asina akordu ho konsellu imprensa ne'e kona-ba kontinuidade ba renovasaun programa liberdade empreza mak ha'u-nia liberdade, hanesan orgaun públiku fó espasu orgaun estadu ninian, hodi bele fó sai nia programa ba públiku bele hatene no komprende”, esplika nia.
Ba akordu ne'e la'ós foun maibé kontinuidade husi akordu tinan 2021 ninian, maibé iha andamentu balun atu kompleta de'it buat balun, asina akordu ne'e ba tinan ida ne'e nian.
“RTTL,EP agradese ba kontinuidade kooperasaun ho Konsellu Imprensa apoiu tomak iha tinan 2021, maske iha difikuldade oioin maibé ami konsege ezekuta fó espasu ba Konsellu Imprensa bele uza hodi dezamina informasaun ba povu”, dehan nia. (*)