Kordenadora Eskola EBF vila nova Baukau, Dulce Doutel Freitas, hatete, konstrusaun moru protesaun ba eskola nian, dadaun fundus mai husi inan-aman, estudante inklui konsellu profesores na’in-36, ne’ebé kada ema ida kontrubui US$10.
"Husi klase 1 to'o klase 6 tinan-6 hatama US$10 dala ida, dadaun osan iha US$6,950 sei iha restu US$323 mak ami sei hein atu kontribui tán, ne'e ajuda husi Governu laiha, ne'e husi estudante nia inan aman de'it," dehan Dulce iha resintu EBF vila nova Baukau, tersa (15/03).
Konstrusaun atu asegura estudante sira husi konfrontu, tanba dala barak akontese tuda malu, halai tama fali ba resintu eskola nian, hodi fó risku ba estudante.
Alende ne’e, eskola refere iha tempu loraik, sai fali fatin halimar nian ba joven sira ne'ebé la eskola hodi halo estragus fasilidade eskola hanesan vidru janela, lutu aifunan nian.
"Konstrusaun ne'e, bele garante ona ba ami nia estudante no fasilitade sira ne'ebé iha," nia argumenta
Nune'e, Asosiasaun Pais Profesores (APP) eskola EBF vila nova Baukau, Paul do Rozario Gama hatete, konstrusaun moru protesaun inisiativa mai husi inan-aman estudante no mestri sira, tanba depende liu ba Governu sei hasoru prosesu kleur.
"Ami nia mestri sira halo proposta mós laiha resposta ne'ebé pozitivu ne'e mak ami halo inisiativa mesak enkontru hamutuk deside kada alunu ida US$10," nia hatete
Entertantu konstrusaun moru protesaun hahú iha inisiu fulan-fevereiru tinan 2022 ho medida 400 kuadradu, tuir planu sei finaliza iha fulan-abril tinan 2022. (*)
