Login to your account

Username *
Password *
Remember Me

MESSK Admite Kandidatu Estudante 6.007, UNTL ‘Hakdasak’ iha Prosesu Aprendizajen

Mágnifiku Reitór, Universidade Nasional Timor Lorosa'e (UNTL), João Soares Martins. Mágnifiku Reitór, Universidade Nasional Timor Lorosa'e (UNTL), João Soares Martins. Foto Tempo Timor

Tempotimor (Dili)-Universidade Nasionál Timor Lorosa'e (UNTL) sei kontinua hakdasak iha prosesu aprendizajen iha tinan akedemiku 2022, tanba Ministériu Ensinu Superiór Siénsia no kultura (MESSK) admite kandidatu estudante 6.007, ne’ebé liu kapasidade Ensinu Superior Públiku liliu UNTL.

Mágnifiku Reitór, Universidade Nasional Timor Lorosa'e (UNTL), João Soares Martins hatete, kandidatu adminitidu iha Universidade Nasionál Timor Lorosa'e (UNTL) ho totál 6.007 iha tinan 2022, fó dezafius ba prosesu ensinu, tanba fakuldade balun problema ho infraestrutura.

“Ami-nia proposata inisiál ne'ebé hetan konkordánsia hamutuk ho sua eselénsia Ministru antes de anunsiu ne'e 4.100, mais ohin rezultadu anúnsia formál 6.007 pesoál, entaun liu kedas 1.907 pesoál, númeru ida boot tebtebes, ne'e atubele dehan katak tau mós impedimentu, problema, dezafiu ba prosesu de ensinu tanba iha fakuldade balun ke infraestrutura seidak di'ak”, informa Reitór UNTL iha Salaun Fundasaun Oriente, Bairo dos Grilho, sesta (25/02).

Tanba iha fakuldade sira ida ka rua; pur ezemplu ekonomia tanba iha edifísiu foun ladun iha problema, fakuldade enjeñaria laiha problema, maibé restante fakuldade sira seluk sei atravesa problema purke númeru estudante boot tebtebes.

“Entaun ami husu para, ami kria informalmente ho Ministru atubele tau atensaun ba kestaun ne'e bele ajuda hadi’a infraestrutura UNTL nia, bele apoiu tan orsamentu mai UNTL ba hadi’a ka konstrui tan edifísiu foun ba tinan oin, atu nune'e bele ajuda prosesu ensinu la'o ho di'ak”, dehan nia.

Ba estudante ho númeru boot implika mós rekursu umanu, tanba ne’e númeru profesór tenke aumenta, sala de aula tenke aumenta. Maske problema maibé sei la bele kontra desizaun Governu rasik.

“Mais prontu ami tenta komu universidade públiku úniku universidade Timor-Leste ne'e desizaun Governu nian, ami la bele kontra, maibé ami aprezenta katak ami mós iha situasaun difikuldade barak, iha obstaklu limitasaun barak ne'ebé Governu mós tenke tau atensaun mós”, informa Reitór.

Enkuantu Fakuldade ne'ebé iha dezafiu boot liu mak Fakuldade Siénsia Sosiál, Edukasaun, tanba sempre ho númeru estudante boot tebtebes nune'e presiza atensaun maka’as.

Ho estudante ne'ebé pasa iha UNTL totál hamutuk 6.007 maibé seidauk iha númeru distribuisaun ba kada fakuldade.

Aliende ne'e, Prezidente Institutu Politekniku Betanu (IPB), Acaçio Cardozo Amaral hatete, IPB difikuldade ne'ebé hasoru mak laboratóriu la sufisiente.

“Ami-nia laboratóriu, por ezemplu agora ami-nia estudante sira iha enjeñaria sivíl karik sira ba sentru formasaun Tibar halo prátika intensivu iha ne'ebá, ami-nia fasilidade laiha la siknifika sira la prátika, soke sira prátika tenke ami koopera ho instituisaun seluk hanesan sentru formasaun Tibar para bele prátika iha ne'ebá, iha kampus laran rasik iha, maibé seidauk sufisiente”, informa nia.

Ba prosesu rejistrasaun estudante foun hahú iha loron 7 fula-marsu, hafoin orientasaun sei planea ba loron 20 ba leten, durante loron 3 no banhira hotu hahú kedas prosesu aprendijazen.

Ba rezultadu kandidatu estudante ne’ebé Ministériu Ensinu Superiór Siénsia no kultura (MESSK) admite ba Universidade Nasionál Timor Lorosa'e (UNTL) hamutuk 6.007 no ba Institutu Politeknik Betano (IPB) na’in-345 ba tinan akadémiku 2022

“Totál kandidatu sira ne'ebé admitidu ba UNTL no IPB ho totál númeru rihun-neen-atustolu-limanulu-resin-rua (6.352), husi númeru ida ne'e, rihun-neen-resin-hitu (6.007) ba UNTL no atustolu-haatnolu-resin-liman (345) ba Institutu Politekniku Betanu (IPB), kandidatu ne'ebé asesu ba tinan 2022”, deklara Diretór Jerál Ministériu Ensinu Superior Siénsia no Kultura, Maria Filomena Lay Guterres, iha Fundasaun Oriente, Bainro dos Grilhos, sesta, (25/02).

Ba prosesu asesu ensinu superior públiku ba estudante foun tinan akadémiku 2022, ne'ebé implementa ona husi Ministéru Ensinu Superior Siénsia no Kultura (MESSK), Universidade Nasionál Timor Lorosa'e (UNTL) no Instituto Politeniku Betanu (IPB) iha kompetensia ba komisaun ne’ebé define.

Tanba ne’e, hahú aprovasaun diploma Ministerial no. 58/2021, 16 de Agostu, liuhusi diploma ne'e, fó kompeténsia ba Comissao de Acesso a Ensinu Superior (CAES) hodi responsabiliza ba atividade hothotu ba relativa asesu ensinu superiór públiku.

“Objetivu atu promove prinsípiu igualidade kona-ba oportunidade no respeitu ba diferensa, nune'e establese rejime rua hodi asesu ba Ensinu Superiór Públiku: Rejime Jerál, fó oportunidade ba finalista sira husi ensinu sekundáriu tinan 2021, Rejime Espesial, fó oportunidade ba kandidatu sira ne'ebé mak sei iha situasaun exensionál”, esplika nia.

Finalista husi Ensinu Sekundáriu jerál (ESJ) no Ensinu Sekundáriu Tékniku Vokasionál (ESTV), ho rezultadu finál mak hanesan, rihun-ruanulu-resin-neen-atus-haat-ualunulu (26.480).

Rejime espesiál ba sira ne'ebé admitidu ba UNTL no IPB, atus lima limanulu-resin-neen (556), husi númeru ida ne'e, atuslima-ruanulu-resin-hitu (527) ba UNTL no ruanulu-resin-sia (29) ba IPB.

Ba kandidatu sira ne'ebé kategória oportunidade ne'ebé la admitidu ba Ensinu Superiór Públiku ho totál hamutuk rihun-tolu-hitunulu-resin-hitu (3.077).

Haree ba kategória veteranu no martire sira-nia oan, sira ne'ebé admitidu ba UNTL no IPB, husi atusneen-limanulu (650), husi númeru ne'e, atusneen-tolunulu-resin-hitu (637) ba asesu UNTL no sanulu-resin-tolu (13) ba IPB.

Kandidatu sira husi veteranu no mártire sira-nia oan ne'ebé la admitidu ba ensinu superiór públiku hamutuk atus-ida-resin-tolunulu-resin-sia (139).

Iha mós kategoria hakbi'it, kandidatu sira ne'ebé admitidu ba UNTL no IPB hamutuk atustolu-sanulu (390), husi númeru ida ne'e, atustolu-limanulu (350) ba UNTL no haatnulu (40) ba IPB. Ba sira ne'ebé kategória hakbi'it ne'ebé la admitidu ba ensinu superiór públiku hamutuk atuslima-ualunulu-resin-sia (589).

Husi kategória sira seluk husi rejime espesiál hanesan ema ne'ebé remata ona ensinu superiór, tinan boot liu 23, desportista, ema estranjeiru, Timoroan ne'ebé remata Ensinu sekundáriu iha estranjeiru, husi eskola internasionál, diplomata nia oan, ema ho difisiénsia.

Ministériu Ensinu superiór, Siénsia no kultura informa katak rezultadu finál hanesan lista ho naran kandidatu sira ne'ebé admitidu sei divulga liuhusi Website hanesan: website Ministériu Ensinu Superiór Siénsia no Kultura (http://mescc.gov.tl), website Universidade Nasionál Timor Lorosa'e (www.untl.edu.tl), ho pájina facebook MESCC, pájina facebook UNTL no pájina facebook IPB. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« May 2024 »
Mon Tue Wed Thu Fri Sat Sun
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    

Tempo Timor Networks

Online Counter