Koordenadór Lia-Na’in Timor-Leste, Eugenio Sarmento hatete, atividade serimónia rituál no kultura ne’ebé halo manu aten hatudu sinál faillansu oituan, tanba ne’e iha kampaña kandidatu na’in-16 sei insulta no hasai liafuan kroat ba malu.
“Manu nia aten no urat ne’ebé mak lian-na’in sira husi Munisípiu hothotu haree hatudu faillansu oituan, maibé sira hadi’a fali buat hotu mesak ladi’ak, tanba ne’e kandidatu na’in-16 iha kampaña sei insulta no trata malu, maibé sei la afeita kazu boot”, dehan Eugenio, iha salaun CNE, Kolmera, kinta (24/02).
Tanba durante loron rua CNE ho lia-na’in husi Munisípiu Sanulu-resin-rua inklui RAEOA realize ativdade serimónia rituál, ba palku eleisaun pasifiku ho kultura promove paz no unidade iha eleisaun prezidensiál tinan 2022.
Iha atividade kulturál ne’e, reprezenta kandidatu Prezidente Repúblika na’in-16 halo ona juramentu liuhusi lisan Timor ho Maromak hodi lok ona bua ho malus husu kandidatu sira tenke respeita malu.
Sekretária CNE, Odete Maria Belo afirma, sei garante eleisaun prezidensiál la’o di’ak, tanba ne’e CNE realiza serimónia rituál no kulturál hodi reprezenta munisípiu sanulu-resin-rua inklui ROAEA halo ona hamulak atu kandidatu sira iha kampaña labele insulta malu iha palku.
“Durante kampaña ita-nia kandidatu sira labele iha lifuan kroat atu insulta malu, maibé sira tenke respeita malu nu’udar timoroan atu tau aas dignidade nasaun Timor-Leste nia ho povu nia naran di’ak iha mundu”, afirma nia. (*)
