Tempotimor (Dili) – Ministru Kordenador Asuntu Ekonomiku (MKAE), Fidelis Manuel Leite Magalhães hatete, numeru dezempregu iha nasaun Timor-Leste, kuaze %10.

"Tuir data hatudu katak, populasaun %74 ne'e maioria mak joven ho idade 35 mai kraik, i tuir dadus mós ita iha nivel dezempregu pur volta %10," dehan Fidelis ba jornalista hafoin partisipa preparasaun ideia inovativu iha Otel Novu turizmu, Kinta (05/12/19).

Fidelis afirma, Iha nivel dezenpregu ne'e maioria ne'ebe seidauk hetan oportunidade ba empregu mak joven tantu feto no mane.

Nia dehan, barak liu dezenpregu kompara feto no mane, feto mak maioria seidauk hetan oportunidade ba empregu.

Governante ne'e akresenta, Iha faktus no dadus hirak ne'e, governu kontinua nafatin esforsu, servisu hamutuk ho agensia sira par hare ba asuntu dezenpregu, liu-liu espesifiku ba joven sira ne'ebe dezenpregu.

Ladún Fiar

Iha sorin seluk, Vise Prezidente I Parlamentu Nasionál (VPPN) Maria Angelina Sarmento ladún fiar katak númeru dezempregu iha Timor hela de'it %10.

"Ba ha'u, hanoin dadus dezempregu iha TL tuun ba %10 ne'e seidauk konvense ha'u," afirma vise Angelina.

Deputadu bankada PLP ne'e, husu governu atu aprezenta dadus ne'ebé kredivél, relasiona ho dezempregu iha Timor Leste.

"Presiza hato'o dadus ne'ebé mak kredivél ba númeru dezempregu ne'ebé ita konsege redúz ona ka mantein, ka aumenta tan karik. Pur enkuantu ha'u mós seidauk asesu governu nia informasaun detallu liu kona-ba númeru dezempregu no pursentu hira mak tuun ona, mais ita haree ba realidade de'it, ema barak mak sei buka servisu i maioria servisu sira ne'e fornese de'it husi seitór públiku," dehan Anjelina.

Tempotimor (Dili) – Ministru Saúde (MS) interino, Bonifacio Maucoli Dos Reis dehan, nia parte seidauk hatene kona-ba ema deskoñesidu lori sai sasán médiku husi Hospitál Nasionál Guido Valadares (HNGV), iha dia 08 Novembru maizumenus tuku 09.14 kalan.

“Ha'u seidauk hetan informasaun. Depois ha'u hetan ha'u sei verifika. Depois mak ha'u fó fila informasaun,” dehan MS interinu ne'e iha Palásiu Governu hafoin remata reuniaun Konsellu Ministru, Kuarta (20/11/19).

Iha fatin hanesan, Vise Ministra Saúde, Elia dos Reis Amarál hatete, sei mosu duni iregularidade, nia parte sei lori ba dalan legál.

"Ne'e informasaun. Seidauk hatene loos duni ka lae. Sei karik loos sei submete ba parte legal. Sei laloos signifika informasaun de'it," dehan vise MS ne'e.

Nia dehan, bainhira informasaun ne'e loos duni, sei entrega ba diretór HNGV hodi bele haree saida  mak nia bele halo.

"Durante ne'e, regras iha hela. Mas kariik ida ne'e mak akontese duni, sei submete ba iha diretór. tanba diretór mak iha responsabilidade aas, hodi responsavél ba iha iregularidade ne'ebé mak iha parte HNGV nian," dehan Elia.

Hanesan média ne'e públika ona, iha 08 de Novembru 2019, maizumenus tuku 09.14 kalan, autoridade seguransa iha Hospitál Nasionál Guido Valadares (HNGV) konsege deteta feto na'in rua, hit sasán balun (dos rua), sai husi odamatan HNGV hodi tula sasán hirak ne'e, iha karreta Jeep koor mean.

“Ami investiga hela lala'ok hirak ne'e, tanba mosu deskonfia katak sasán balun iha HNGV ema tula sai,” hatete fontes ne'ebé lakohi temi nia identidade ba tempotimor.com, Tersa (19/11/19).

Fontes ne'e informa, lala'ok ne'e mós akontese tan iha loron Tersa (12/11/19). Ho karreta tipu no koor hanesan, feto na'in rua tula tan sasán balun ne'ebé deskonfia sasán médiku, sai husi resintu HNGV no tula sasán hirak ne'e iha karreta, ne'ebé para hela iha karreta para fatin, besik HNGV.

Fontes ne'e katak, parte seguransa halo ona investigasaun ba karreta na'in. Informasaun preliminaria hatudu mosu indikasaun forte katak, iha aktu ne'ebé lori sai ekipamentus médiku husi HNGV ba liur.

“Sim. Investigasaun se la'o hela. Deskonfia iha ema laran mak envolve,” fontes ne'e hatete tan.

Ba média ida ne'e, fontes ne'e hato'o ninia laran triste. Nia dehan, bainhira HNGV menus aimoruk públiku no Parlamentu sempre hakilar kestiona, hodi fó todan ba manajementu HNGV.

“Maibé, dala balu mosu mós hahalok balun hodi fó prejuizu,” nia hateten.

Tempotimor (Dili) – Vigariu Jerál Episkopál Dioseze Metropolitan Dili, Padre Juvito do Rego konsidera Governu nia pozisaun ne'ebé kontratu asesór barak, hanesan moras kolonializmu ne'ebé seidauk lakon husi Timor-Leste.

"Ha'u lahatene, ita hanesan moras kolonializmu ne'ebé mak la remata iha ita nia vida. Kuandu iha asesoria demais ne'e, nova forma de kolonializasaun mental psikolojika. Ita nunka liberta ita nia an.  Husik povu ne'e livre," afirma Amu Juvito iha Palásiu Prezidensiál Bairru-pite hafoin partisipa iha serimonia entrega Colar de Ordem, Sexta (22/11/19).

Nia dehan, povu ne'e povu livre. Ne'ebé lalika hanehan. Sei hakarak aprende, tenke investe ba timoroan sira. Haruka ba eskola atu mai desenvolve Timor-Leste.

"Halo partidu, depois to'o ikus ita ba tau ema sira ne'ebé ukun ne'e, ema ne'ebé kompetensia no kapasidade laiha mós  tuur iha ne'ebá," nia tenik.

Tuir Amu Juvito, uza asesór kuandu nesesidade bo'ot tebes no haree katak ida ne'e, timoroan labele halo ona. Maibe, nia dehan, kuandu timoroan bele halo, la presiza alerjia ho maluk timoroan ou tauk tanba balun matenek liu. Ou tauk hodi bolu asesór sira iha liur mai tanba hatene liu.

“Sentimentu nasionalismu no patriotismu ne'e iha ne'ebé? Atu harii rai ida ne'e ho forma kolonializmu foun, ne'e ha'u  la konkorda. Ha'u hanoin maski  ita beik demais, beik demais maibé ita la presiza asesoria ida barak demais," nia esplika.

Tempotimor (Dili) – Sekretáriu Estadu Formasaun Profisionál Emprego (SEFOPE), Julião da Silva promote sei hadi'a SEFOPE husi akuzasaun hirak ne'ebé públiku akuza. SEFOPE dehan, ida ne'e atu hadi'a servisu Governu.

Nia dehan, akuzasaun hirak ne'ebé sosiedade kestiona nia parte entrega ona ba KAK, Funsaun Públiku no PDHJ hodi hetan rekomendasaun. “Espera, iha semana ida nia laran hetan ona relatoriu ka rekomendasaun balu husi ekipa independensia hirak ne'e, para bele hadi'a ou mellora servisu di'ak  liután,” Julião hatete.

SEFOPE rekoñese, iha tendensia lubuk ida ne'ebé sosiedade sira kestiona. Nia fó ezemplu hanesan lia fuan nepotismu no servisu laloos.

“Hanoin hirak ne'e, normál. Tanba, sosiedade hotu-hotu iha direitu no papél ida para halo krítiku ba servisu Governu nian, hodi nune'e bele hadi'a," Julião esplika ba jornalista iha Palásiu Governu, Kinta (10/10/19).

Kona-ba rekrutamentu ba traballadór sira ne'ebé atu ba Austrália, Julião dehan iha ona perfil ne'ebé haruka ona ba ajénsia ou kompañia sira, depois agora hein rezultadu manda fila mai. Kandidatu sira mós sei tuir tan teste ba dala ikus nian, para balun ne'ebé prenxe ona rekezitus, bele aranka ba ona," tenik Julião.

Tempotimor (Dili) – Ministru Negósiu Estranjeiru no Kooperasaun (MNEK), Deonisio Babo Soares hatete, agora daudaun ne'e iha timoroan na'in 60 ne'ebé kontinua hela sira-nia estudu iha Kuba.

“Kuba nu'udar nasaun aliadu ba Timor-Leste, iha sira-nia komprimisiu hori uluk to'o agora, atu forma timoroan sai mediku hamutuk 1000 pesoas. Daudaun ne'e, iha ema 60 mak halo hela sira-nia estudu iha Kuba. Na'in 17 estuda iha área espesialista mediku no balun iha área matemátika no siensias,” informa Babo iha Palásiu Governu bainhira remata enkontru ho Primeiru Ministru, Segunda (14/10/19). 

Tuir Babo, ninia sorumutu ho PM Taur mós atu relata rezultadu enkontru ne'ebé foin lalais nia partisipa iha Asemblea Jerál Nasoins Unidas.

"Iha pontus importante lubuk ida, ne'ebé ko'alia iha reuniaun Nasoins Unidas nian. Ko'alia ba dahuluk nian mak kestaun klimatika, dezenvolvimentu sustentável, asuntu jeneru nomós atividades relasiona ho ekonomia mundiál ne'ebe hala'o iha asembleia nasoins unidas nian," Babo esplika.

Nia subliña, intervensaun husi nasaun Timor-Leste nian iha asembleia jerál nasoins unidas foka liu ba mudansa klimatiku, emisaun de karbonu ou polusaun.  Tanba, tuir MNEK, bele ajuda nasaun ki'ik sira ne'ebé  envolve.

"Problema ne'ebé mosu iha Azia Pasifiku mak kestaun tasi sa'e no udan boot maka'as liu fó impaktu ba seguransa alimentar," nia esplika.

Nia afirma, relasiona ho problema hirak ne'e, Timor-Leste la'o hamutuk ho nasaun ki'ik sira iha mundu, tenta atu mobiliza para bele apoiu liuhosi nasaun boot sira, hodi sobrevive iha tempu naruk.

Tempotimor (Dili) – Hospitál Nasionál Guido Valadares (HNGV) sei menus ekipamentus bainhira pasiente barak halo tratamentu ka baixa iha Hospitál refere.

Vise Ministra Saúde, Doutora Elia dos Reis Amarál informa kestaun ne'e, depois ninia vizita regular hodi akompaña servisu, ne'ebé dirijentes sira hala'o ona iha HNGV.

"Objetivu husi vizita ne'e, hodi akompaña servisu dirijentes sira halo iha departamentu espesializada, para bele fó apoiu, hodi eleva kualidade atendimentu ba pasiente sira," Vise Ministra ne'e informa ba média iha HNGV, Sesta (04/10/19).

Nia dehan, Ministériu Saúde iha ona planu atu bele halo kompleta ekipamentus hirak ne'ebé sei menus liuliu iha parte ICU nian iha HNGV.

"Ami iha ona planu hodi bele harii ICU ne'ebé durante ne'e okupadu para bele balansu di'ak iha tinan ida ne'e," nia promote.

Hospitál Nasionál Guido  Valadares (HNGV) bele halo de'it atendimentu ba pasiente sira ne'ebé  emerjensia no kuidadu saúde primaria tanba fasilidade sufisiente hodi atende pasiente sira ne'ebé  moras normál no ladún emerjensia.

KSOLOK seremonia tinan 20 referendu ka Konsulta Populár, liu tiha ona. Timoroan, liuliu estranjeiru sira ne'ebé hetan rekonesementu no valorizasaun ba sira-nia kontribuisaun ba rai doben ida ne'e mós, fila hotu ona.

Maski nune'e, iha naran ida ne'ebé komisaun organizadora tinan 20 referendu haluha tiha husi lista naran konvidadus estranjeiru sira. Ema ne'e, loloos hetan mós kondekorasaun iha seremonia tinan 20 referendu ka Konsulta Populár.

Saskia Kouwenberg. Feto Olanda ida ne'ebé brani duni. Sei la'ós tan Saskia, mundo internasionál sei la hatene, saida mak akontese iha masakre Santa Cruz, 12 Novembru 1991. Ho ninia brani, Saskia konsege lori sai husi Timor, kasete gravasaun video Max Stahl nian iha Santa Cruz.

“Saskia feto brani tebes no determina subar kasete iha nia roupa laran hodi nune'e mundo bele haree imajen 12 Novembro nian,” hatete A.F de Sa, ema ne'ebé koñese Saskia liu husi istoriador balun.

Tuir fontes ne'e, estadu Timor-Leste kondekora ona ema barak. Maibé, ema ne'ebé merese liu, barak mak estadu haluha ou la hatene, nune’e ladauk valoriza sira nia kontribuisaun inklui Saskia.

Konvite ne'ebé Komité Popular fó sai, Segunda (09/09/19) hatete, komité ne’e sei oferese Prémiu Populár ba Saskia.

“Hanesan Timoroan barak hatene katak mana Saskia (Jornalista Freelance iha tempu ne’ebá) mak lori sai filmajen 12 Novembru 1991 nian ne’ebé Jornalista Max Stahl halo no subar hela iha rate laran, tanba tauk Militár Indonézia hadau husi nia,” hakerek konvite ne'ebé fó sai husi Komité populár.

“Mana Saskia lori sai Filme ne’e ho maneira brani no determinadu. Lori ba hatudu iha nasaun boot sira ne’ebé antes ne'e apoiu Indonézia nia okupasaun. Ikus mai nasaun hirak ne'e muda sira-nia pozisaun, fó sansaun ba Indonézia no apoiu ba Timor-Leste nian auto-determinasaun,” hakerek anunsiu komité populár.

Komité Populár sei oferese prémiu rekoñesimentu nian ba Mana Saskia. Ba nia dedikasaun sira ne’ebé nia halo ona ba rai doben Timor Lorosa’e,” komité populár hatete.

Entrega prémiu populár  ba Saskia ne’e sei realiza iha Komité 12 Novembru, Balide, Tersa (10/09/19) tuku 9.30 OTL.

Tempotimor (Dili) – Prezidente Kámara Komérsiu Indústria Timor-Leste (CCI-TL), Oscar Lima iha ona komunikasaun ho Autoridade Nasionál Petroleu no Minerais (ANPM) hodi envolve emprezariu nasionál no privadu iha dezenvolvimentu Greater Sunrise.

"Hakarak ka lakohi, seitor privadu sira tenke hadia sira nia an rasik, para sira bele ba kompete iha área sira ne'ebé mak bele fó benefisia no benefisia husi fronteita marítima ne'e rasik, kona-ba mina no gas," dehan Prezidente CCI-TL ,Oscar Lima iha nian knaar fatin, AKAIT, Dili, Sesta (13/09/19).

Nia akresenta, atu envolve iha dezenvolvimentu Mina no Gas la fasil. Maibé, bele fó oportunidade ba ema barak atu servisu.

"Mina no Gas ne'e la'ós buat ida ne'ebé mak fasil. Maibé la'ós buat ida ne'ebé kee ema hotu-hotu labele servisu. Iha servisu barak ne'ebé ke iha ligasaun," nia afirma

Alende ne'e, Prezidente ho ekipa CCI-TL nia mós ko'alia ona ho governante sira inklui ANPM para fó prioridade ba emprezariu nasionál sira.

"Ami ko'alia namanas ho Governante sira. Ami ko'alia ona ho Autoridade Nasionál Petroleu no Minerais (ANPM) halo nusa mak husu para bele fó mós prioridade balun ne'ebé Timoroan bele halo ne'e fó ba emprezariu Timoroan. Se ita la fó ba emprezariu Timoroan, entaun Mina no Gas ne'e nia benefisius ne'e la'ós ba ita. Mas Mina no Gas ne'e emprezariu internasionál sira lori hotu osan ba liur. Entaun ita Timor la hetan buat ida,"Oscar esplika.

Emprezariu ne'e mós subliña, bainhira Governu la fó oportunidade ba emprezariu Timoroan, mak emprezariu internasionál sei la liga. Nia dehan, hanesan mós obras barak iha Timor-Leste kona-ba konstrusaun sivil, ema la liga emprezariu Timoroan sira.

Tempotimor (Dili) – Primeiru Ministru Taur Matan Ruak hatete, Siméira Petróliu no Gas nu'udar jornada foun ba Timor-Leste, hodi atinje metal ne'ebé mak iha, kona-ba povu nia moris di'ak.

"Eventu ne’e reprezenta marka importante ida iha jornada Timor-Leste nian atu bele sai nu’udar destinu preferensiál ba negósiu sira no investimentu iha Sudeste Aziátiku, iha área esplorasaun no produsaun petróleu no gás nian," hatete Primeiru Ministru Taur Matan Ruak iha ninia diskursu iha Centru Convensoens Dili (CCD), Kinta (03/10/19).

PM Taur dehan, ho númeru partisipante ne’ebé barak tebes, sai hanesan prova ida katak Timor-Leste sai nu’udar destinu preferensiál ba negósiu sira no investimentu.

Xefe Governu ne'e fiar, iha tinan balun ne'ebé sei mai, ema hotu sei hanoin katak ohin nu'udar loron istóriku ba Timor-Leste.

"Ami fiar katak, hahú ohin ba tinan balu tan, ema hotu sei hanoin katak loron ida ne’e, nu’udar loron ida ba determinasaun no responsabilidade. Ne’ebé, deside tiha ona dalan sira ba Timor-Leste hodi alkansa ninia rekoñesimentu ne’ebé maka nia merese duni, hanesan autór importante ida iha indústria internasionál petróleu no gás nian," dehan TMR.

Nia afirma, siméira dahuluk ne’e kona-ba Petróleu no Gás Timor-Leste nian akontese daudaun iha momentu ida krusiál ba TL nia dezenvolvimentu, progresu no modernidade.

"Ita konsege to’o akordu ida ho ita-nia país vizinhu, Commonwealth Austrália nian, kona-ba estabelesimentu fronteira marítima ida ne’ebé permanente entre nasaun rua. Nune’e, taka ona kapítulu ida ne’ebé importante tebetebes ba ita-nia istória, ne’ebé dura tempu barak nia laran," nia komenta.

Esforsu ne'ebé nasaun rua ne'e halo, tuir PM Taur, atu lori povu ba moris di'ak.

"Esforsu estraordináriu ne’ebé hala’o ona husi país rua ne’e, hodi alkansa Tratadu Fronteira Marítima foun no aseitasaun jerál tratadu ne’e nian, hatudu katak nasaun sira bele hakat liu difikuldade polítika atu buka interese di’ak liután ba sira-nia povu," tenik PM Taur.

Tempotimor (Dili) – Ekipa ida, lidera husi eis Prezidente interinu RAEOA-ZEESM, Arsenio Paixão Bano, Segunda (18/11/19) fó briefing kona-ba lala'ok seitór hotu iha RAEOA-ZEESM ba Prezidente foun RAEOA-ZEESM, José Luis Guterres ‘Lugu’, iha edifísiu ZEESM nian, Farol-Dili.

"Ohin ami mai ekipa boot husi RAEOA-ZEESM, kompostu husi sekretáriu nain 6 no ami ekipa hamutuk 22 ho téknika sira tomak. Ami mai fó briefing tomak ba seitór hotu. Hanesan seitór finansas, agrikultura, ordenamentu territóriu, saude no servisu jerál iha Oekusi," dehan Arsenio Bano ba jornalista.

Tuir Bano, husi sira-nia aprezentasaun, Prezidente foun RAEOA-ZEESM, inklui ninia asesór tenta rona hotu. Tanba, iha servisu barak ne'ebé presiza halo iha RAEOA.

Alende ne'e mós, Bano dehan, parte téknika hato'o sira nia preokupasaun kona-ba orsamentu tinan 2020. Tanba, iha programa no ambisaun barak hakarak Oekusi sai pilotu, tuir mehi Timor-Leste nian.

“Iha pilotu barak sempre iha difikuldade barak. Nune'e, prezidente foun presiza rona maka'as husi téknika sira, kona-ba aprezentasaun ne'e,” nia esplika.

Page 1 of 27

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com