Print this page

SIJK Rejista Kazu Pozitivu Covid-19 iha Dili Sa'e ba 7.3%

Koordenador Forsa Tarrefa iha Sala Sentru Integradu Jestaun Krize (SS-SIJK), Rui Maria Araújo Koordenador Forsa Tarrefa iha Sala Sentru Integradu Jestaun Krize (SS-SIJK), Rui Maria Araújo Foto Arkivu

Tempotimor (Dili) - Durante semana ida hahú husi loron 16 to'o 22 fulan Abril 2021 ne'e, Sentru Integradu Jestaun Krize (SIJK) rejista kazu pozitivu covid-19 iha munisipiu Dili, ho nia prevalénsia sae ona ba pursentu 7.3 (7.3%).

Persentajen ne'e SIJK rejista, husi ema na'in 5.799 ne’ebé halo teste rastreiu aleatóriu no rastreiu atu halo viajen sai husi serka sanitaria Munisipiu Dili, maibé SIJK deteta ema na'in 425 mak pozitivu covid-19.

"Aumenta prevalensia iha semana 16 to'o 22 Abril 2021, kompara ho semana 2 antes iha 2 too 15 Abril, hatudu ona katak surtu iha munisipiu Dili aumenta ba bebeik no hatudu mós katak ema barak liu tan ona maka infetadu", hateten Koordenador Forsa Tarrefa iha Sala Sentru Integradu Jestaun Krize (SS-SIJK), Rui Maria Araújo, sabadu (24/04/2021).

Nia dehan, haree mós ba faktu katak maioria husi ema ne'ebé detetadu pozitivu maka la hatudu sintomas, katak ema ne'e rasik la hatene katak nia miras hela, no ida ne'e signifika SARS-CoV-2, daet makaas ba mai iha populasaun sira iha Dili nia leet.

"Sé ita aplika 7,3% ba populasaun Dili, signifika atualmente, iha maizumenus 20 mil pessoas maka infetadu ho virus SARS-COV-2 iha munisipiu Dili", tenik Rui.

Tanba ne'e, nia dehan, to'o ohin sabadu (24/04) iha munisipiu Dili rejista de'it kazu infetadu hamutuk 1.542 no ida ne'e signifika maioritáriamente kazu pozitivu la detetadu.

"Ajusatamentu ka aglomerasaun ema durante konfinamentu domisiliária jeral iha fulan Marsu ho Abril, aglomerasaun ema hafoin inundasoens iha 4 Abril no insidente Vera Cruz dia 12 to'o 15 de Abril halo boot liu tan risku propagasaun virus iha populasaun nia leet", dehan nia.(*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items