Vítima sira ne’ebé afetadu inundasaun iha loron 4 fulan-abril, tanba lakon uma no sasán mak grupu solidariedade iha loron sábadu (24/04) fó apoiu hahán bázika ba uma kain hirak ne’ebé presiza.
Responsabilidade ba grupu solidaridade, Orácio Mendes hatete, nudar ema umanu iha sentimentu atu fó asisténsia ba vítima sira ne’ebé presiza duni apoiu.
“Ami iha sentimentu mak agora lori hela mai ba maluk sira, la'ós ami de'it maibé ema barak mak hala'o asaun karidade hanesan ne'e. Ne'e ami hanesan grupu ki'ik ne'ebé halibur depois lori entrega ba maluk sira iha fatin ne'e”, dehan nia ba www.tempotimor.com iha Kapelaun Suku Metiaut, Postu Administrativu Kristu Rei, sábadu (24/04).
Apoiu hirak ne'e, hanesan popok ba labarik kiik (bebé) no livru, lapijeira hodi fasilita labarik estudante, inklui mós fós saka 30, bikan kanuru no sanan.
Koordenadór no atuál delegadu ba aldeia Carumbulau, Armando Coreia da Silva dehann, nia parte agradese ba parseiru ka belun timoroan ne’ebé mak konsege fó ona apoiu umanitária ba vítima sira.
"Ami agradese boot ba kolega timoroan, ne’ebé mak ohin mai iha ne'e fó ajudu balun mai ami”, hatete nia.
Hahú husi akontesimentu to'o agora, Eis Prezidente Repúblika (PR), Jose Ramos Horta, inklui parseiru nasional no internasaionl, no belun di’ak timoroan, mos konsege fó ona ajudu balun ba vítima refujiadu iha kapelaun metiaut.
"Iha ne'e NGO, PLEN, Parseiru sira seluk, inklui mós ita-nia maluk timoroan balun, liuliu maluk sidadaun portugeza, Austrália, hala'o ninia asaun karidade privadu mai iha ne'e, inklui mós ita-nia avo Ramor rasik mós mai to'o ami-nia fatin, hola sasán mai fó tanba haree inan sira oan sira toba iha rai, ne’ebé mai ajuda ami”, dehan nia.
Dadaun uma kain 30 ho membru família hamutuk 149 mak dadaun ne'e hela provizóriu iha fatin kapelaun Santa Margarida Maria Alacoque iha suku Metiaut, tanba sira-nia uma hetan estragu totál.(*)