Hafoin inundasaun ne’e akontese, iha parte lokraik Ministru Asuntu Parlamentár no Komunikasaun Sosiál (MAPKomS), Francisco Martins da Costa Pereira Jerónimo halo vizita direta edifísiu RTTL,ep ne’ebé sai hanesan kolam ikan.
Iha vizita ne’e, ministru MAPKomS dehan, inundasaun ne’e mosu tanba dezastre naturais liuliu udan boot ne’ebé akontese iha Timor-Leste.
“Ohin ne’e situasaun ida kalamidade dezastre naturál halo inundasaun maka’as tanba ne’e mak iha obrigasaun atu ba haree no komunika malun ho membru governu sira para bele fó solusaun ba problema sira hanesan ohin haree Palásiu prezidensiál nian, komunika ho Ministru Obras públika ho diretór sira grasa ba Maromak sira mós halo kontaktu no mobiliza bele neutraliza situasaun iha Palásiu liliu fo’er sira ne’ebé mak sulan iha ponte okos agora hasai no moos hotu ona no Bekora mós halo namanas hela”, dehan Ministru Francisco ba www.tempotimor.com, domingu (05/04).
Governante ne’e mós afirma, situasaun ne’e atu fó hanoin ba sidadaun hotu atu oinsá fó atensaun lalais nune’e bele solusiona problema ne’e.
“Hanesan ohin ba RTTL,ep ba sira ne’e hotu ho hanoin ida katak dalan saida no solusaun ne’e saida presiza halo buat ba lalais atu rezolve problema emerjénsia liliu relasiona ho dezastre naturál no inundasaun ne’e”, dehan MAPKomS.
Entretantu observasaun www.tempotimor.com nian iha ternu nota katak, edifísiu RTTL,ep la’ós tinan ne’e mak bee nalihun hanesan kolam boot, maibé tinan sira ne’ebé liu ba kotuk sempre akontese iha tempu udan. (*)